NSF-i Martyrs’ Day amung

Kohima, March 20 (TYO): Küm 33 tejakdang taküm bendanga agütsüba lanur ana bilemteta Bodbarnü Naga Students’ Federation (NSF)-i tetushi agütsüogo.
IPS cadre tenzükba aser Nagaland nung Disturbed Area Belt kilometer 5 nungi 20 ulushiba anema March 20, 1986 nü NSF-i ola madoki lungkak aitba sentong ka agidang kaketshir ana khaset.
Iba sülen nungi kümshia March 20 nü NSF Martyrs’ Park, Koima nung NSF Martyrs Day amunger.
Lungkak aitba mapang 2nd Nagaland Armed Police force-i kaketshirtem dak injang khaloktsüdang Government Higher Secondary School, Seikhazou nung azünger asür Kekuojalie Sachü aser Mezhür Higher Secondary School nung azünger asür Vikhozo Yhoshü na khaset.
“Onoki tasürtem nem akhüm tetushi agütsür” ta tanü NSF Martyrs’ Park nung sentong agidang NSF general secretary Imtiyapang-i ashi.
“Onoki Naga kaketshirtem aser Naga nunger atema bendanga agütsütsü renema lir” ta paisa shisem.
Iba sentong nung Kohima Ao Baptist Arogo Youth Evangelist Bendangsunep-i sarasadem.