Kechiba Nagaland-i marur ?

Tang Lok sabha atema agiba election asoshi nübo ayimtsü atema kechiba Rahul Gandhi aser Narendra Modi na pronglai Nagaland-i arutsü mejangrar ta asenoki bilemdangtsübaji kanga tongtibang kümogo. Tenaprongla külen Assam tashi aser külen Manipur tashi arur Nagaland matong meyipa aobaji kidanger ki tonga arur asen kidangbo tangudanga mangudang ao amai lir. Tetezü shingaia Nagaland nung alir yimsüsür aser voter-tem ya tangatetter senso tajung rongnung aka ta züngoka malia ta sayur. Tawa Delhi nungi yimten telok kati Nagaland nung par telok asoshi inyaktsü yokba nisung ka ajurua jembidang, paia Nagaland nung-bo yimsüsür aser vote agütsürtem dak election mapang nung sen kanga endoker ta shia liasü. Ibaji dang masü saka Nagaland nungbo kecha mapang endoka election nung nüboyima amongtsü menüngdaker, kechiyong center nung kechi government arudir Nagaland-a iba government-ji kümadoktsü. Nagaland asoshi aji melamelar. Iba jagi balaka tangari mezüngmeshir. Ano, iba jagi balaka Naga yimten tebilemtsü yaa melatetteter südi. Alima nung kechi telok mesüra shiba südir süang ali rongsen aser yimsüsüba mendenji masü saka tangari asenok dak temulung lemtettsüsa aser akümtsübutsüsa asenokji alitsüla. Iba temulung lemtet aser akümtsübuji kechi mapa aser onük nung südir süang tashimyim amshia ozüng agütsüba agi masü mesüra sübokrem amshiba agia masü saka pei tangatetba nung shitak nokdaktetba aser inyaktetba agidang arutsü. Yimten telok shia ya nükjidong tajung yur tentetba teloktem lir, anungji koba telok nung tendir denaka pei telok nükjidongji angateta, tamakok aser takok anguba mapang ajak nung aser jangratema alidang aser timtema aliba mapang ajak nung telok nungi pilaa moi nokdaktetba ajanga dang tangari asenok dak temulung alemtsü aser akümtsübutsü. Tanübo Naga nunger yimsüsür aser nübortem dak iba teronemji samaogo. Tang center nung BJP teloki yimsü asüba agi, BJP telok den külem ser Nagaland nunga yimsü asür, ajisüaka ano election sülen ya center nung Congress arunungbo Nagaland nung yimten telok ajak ya Congress akümtsü rakteptsü. Iba amaji asenok mapang talangka aruogo aser ano tatsükabo yamaisa aotsü, kechiyong yimten telok melenshipet melenshiaka nisungtem tobo kasasa dang lir. Iba ama yimten nung temong maka senzüba agi Delhi nung alir yimsüsür aser ketdangsertemi Nagaland nung yimsüsürtem akümketa mebilemer. Iba jagi, ashiko, Nagaland nung yimsüsürtem aika Delhi nung aliba yimsüsür aser ketdangsertem ajurutsü temmelaba mangur südi. Shitakba agibo, Delhi nungi yimten telok balala lenirtem Nagaland-i arutsü rakteptsüla, kechiyong ibai Northeast nung nüngtugu aser tongtibang state ka lir. Ajisüaka, kidanger state semdanger asenok mesemdang aoba jagi asenoksasa asenok jenjang kanga lua bilemtsüla. Asenok tali meshira aser tebang len nungi adokba ajak agi sen dang süra tangar asoshi talaktsüka asütsü. Election mapang ya vote yoktepba aser aliba mapang masü saka alima yanglushitsüba mapang lir. Iba tangatetba nung kodang asenoki indangindanga yimten nung shilem agidir, asenok akaba makabaji masü saka asenok taküm aküm kanga keta akümtsü. Asenoki asen mapa ajanga asen taküm, kibong aser yimten akümketa lira, asenoki asüngdangtsü melen parnoki asüngdangtsü aser asenok aotsü melen parnokang asenok dangi tonga arutsü. Iba tangatetba aser teimla nung, tang election nung yabo shingaia pei vote senyong meyoki pei vote peisasa enoktsütsü mulungtetdi. Atangji, vote enoktsüi aodang timtem ajurutsüa akok saka timtem tilakata magiibo yimten meyanglutettsü. Election mapang ya alima yanglushiba mapang lir, anungji lenir tajung shimra jungjunga yanglushitettsü aser lenir mejungra teraksa dang raksashitsü. Tang ya danga sen magi arema aser vote agütsütsü ataa nokdakba timtem to agia election nung shilem shitak agitetra, asüngbo tangari asen akümtsübutsü aser asen bushia arutsü. Iba akümjibo election nung akokba takok dang nungi tuluba aser sentiba asütsü.