Sharingain Lkr-i nübuyim sentong tenzükogo

Dimapur, Metsüremi/March 21 (TYO): Nationalist Democratic Progressive Party(NDPP) nungi Progressive Democratic Alliance (PDA) indang candidate Sharingain Longkumer-i taruba 26 Aonglenden Assembly constituency bye election atema nübuyim sentong tenzükogo, ta osang ajanga metetdaktsü.
Iba nübuyim sentong ayonga agiba mapang PDA longjemer mulungteta yokba candidate Sharingian Longkumer-i ashiba agi, iba bye election atema pa dak mulung lemteta alliance tenüng nungi tokteptsü asoshi maongka agütsüba atema PDA sorkar dang pelaba metetdaktsü.
Pai telok dang, nüburtem mangdang tejakleni bener aotsü aser ibaji atalokdaktsütsüji kü khuret. Iba den külemi asür Imtikümzük, shiba taoba Nagaland Assembly Election mapang kasa party ticket nungi shima liasü, pa nükjidong tem bilemteta tushitsü.
Sharingian-isa, 26 Aonglenden constituency ya temoatsü aliba constituency rongnung ka lir, koba ajanga Naga nunger yimten lennisür tajung aika adokdaktsüogo aser iba bye election nung nüburtemi kü nem maongka agütsüra, constituency aser kasa mapang Naga nunger rangben ajungketsütsü atema ni taküm bendanga agüja tenzüktsü mulunga lir, ta metetdaktsü.
Linük ka yanglushitsü atema lanurtemi tongtibang shilem agitsüla ta asüba olen ka nung ajemdaker, pai ashiba agi, nia lanur candidate ka ama lanur mulungjang nung jembibatem ni angatetter aser parnoki temelenshi tuluka adokdaktsünüba atema tejangrabatem ni akok tashi inyaktsütsü; kasa mapang constituency tajungba yanglutsü atema teintet rogo dang nungi shisatsü tajung agia aser nüngdakba meratem agitsüji kanga dang nüngdaker.
Paisa, 26 Aonglenden Assembly constituency bye election ya talisa lanurtem atema tongtibang aser constituency ajungtsü nükla nung yur telongjem ajanga temelenshi bener arutsü atema lanurtem ajungshi, koba tanga kidanger constituency atema tatishitsü tajung ka asütsü, ta shisem.
Pei jabaso ka ama pa nem tetuyuba agüja aser nungittsü atema tsürabur aser party worker tem dang pai mepishia liasü.
Iba den külemi paisa, Lok Sabha menden ya tongtibang aser iba ya senzüka meyutsütsüla, ta shisem.
Tatemsa pai, parliament nung lanurtem atema nokdaktsü aser nübur ajak telongjem nung inyaktsü asoshi mepishia liasü.