NPGs tenüng amer nisung tamajungertemi sen sarur: FU-DALT

Dimapur, Metsüremi/March 21 (TYO): Naga yimtenren teloktem tenüng amer nisung tamajungertemi Aoyim village aser Naga United Village area nung kiojen yanglur nüburtem amokmerena ozüng alema sen akhangba aser sen saruba osang angashia Foothill Unit-Dimapur Ao Lanur Telongjem (Dimapur Ao Youth Organization) aoksar, ta tanü Foothill Unit-DALT President, Tuden Jamir aser General Secretary, Monglie Aier nati sangdong ka nung metetdaktsü.
“Nisung tamajunger aikati ali kiburtem aser mapa inyakertem dang Naga yimtenren teloktem atema saru, ta shia sen akhangba osang Foothill Unit-DALT-i angazükogo. Ano nisung tamajungertemi mapa inyakertem indang mobile phones rakzükba tatalokbatem-a aika lir. Sen akhangba ya tashidak tamajung ka lir, aser ibaji ajanga mapa inyakertem, talisa tzümartemi tetsübu agi mapa inyaktur item tesem toktsür aoba tatalokba aika lir. Item nisungtem yagi nija aser ali kiburtem danga indangindanga sen akhangba tatalokba lir,” ta kasa sangdong nung shia lir.
Kasa nisungtemi Naga yimtenren telok balala tenüng amer sen akhangba tatalokba lir, aser ibaji ajanga ali kibur aikati parnok dang akhangbaji senji magutsüteti mesüra tetsüba agi mapa toktsür, ta parnokisa metetdaktsü.
“Naga nungeri pei li nung ki asüba mapang nung parnok amokmerenba aser sen akhangba ajanga Foothill Unit-DALT jashir. Item ama timtem atema onoki akokba tashi tashi ajak agi inyaktsü. Nija aser lokti tentettemi item ama mapa aitsütsüla aser asen lokti nung iba amokmeren samatsütsü atema longjemer inyaktsü onoki mepishir,” ta sangdong nung shia lir.