Nagalim ka dang alitsü; linük wako ka alitsü: Th. Muivah

Dimapur, March 21 (TYO): Ato Kilonser, NSCN-IM, Thuingaleng Muivah-i, pai Centre dang Nagalim ka dang alitsü aser linük wako den temzüng (Yezhabo) alitsü ta shiogo, ta metetdaktsü.
Brihostibarnü central headquarter, Hebron nung NSCN 40buba Republic amongdang Muivah-i, “Iba onük ya yimtenren onük ka lir, iba nungji sobaliba wako ka masü saka linük wako ka alitsüla aser pei temeja temzüng alitsüla. India sorkari India-Naga ken o ya yimtenren onük ka lir ta agizükogo, ibayongji telok anati ken o jembi. Iba takhangba ya Naga yimtenren temeden nung ajemdaker lir, anungji onoki asen temeden nung atsü-anem masütsü,” ta metetdaktsü.
“India sorkar aser NSCN nati melungtepa 2015 küm August 3 nü Framework Agreement sign asü. Naga yimtenren tebilemtsü latettsü melen tangbo India sorkari Naga nunger tsüngda telongjem maliba nungi maongka agir mapatong balaka benoker,” ta pai ashi.
“Timtemji Naga nunger dak keta lir, anungji ibaji asenoki angatettsüla, mesüra asenoki aibelenba ajanga asenok takoksa angur ka akümtsü,” ta pai ashi.
“Alima ya maneni melenshir aser asenoki imperialist force ka nungi ka ta angur. Asenoki item forces koktetogo aser parnok nem asenok azüokdaktsütsü asenoki memela,” ta pai ashi.
NSCN Chairman, Q. Tuccu-i, “Naga nunger tarutsü putu atema tasütait lenirtemi senmang yutsüogo, aser parnok ya yimtenren nung akangakanga nokdakertem liasü, pei li aser putiotsü atema parnoki bilema inyakogo. Parnoki pei temeden aser nüchiso, maitsü aser sobaliba akhümtsübu aser pei taküm mapayui iba atemaji nokdakogo. Parnoki tenlaba ajanga Naga nunger tarutsü putu taküm lir,” ta ashi.
“Tesüiba mapang asen lenirtemi Nagalim ji Naga nunger atema asütsü, aser Nagalim ji Khrista atema asütsü, ta sangdong. Asenoki linük atema inyakba tamendakdak tongti anaji ibaji lir, aser iba tangatetba ajanga asenok len anir; yamaji parnoki ya tashi Naga nunger aniogo,” ta paisa shisem.
Nüburtem, lokti tentettem, tribal tentettem, Arogotem, sarasadem tentettem aser tangartemi shilem tajung agiba atema pelaba lemsatepa pai, “India-Naga yimtenren ken o latettsü atema onoki maneni inyakdang nenok teyari maneni nüngdaker,” ta mepishia metetdaktsü.
NSCN-IM-i asen kidangertem den angatetteptsü melunga lir aser peipei putiotsü akhümtsübutepa inyaktsü renema lir, ta pai ashi.
Kasa sentong nung Naga Hoho, Naga Students’ Federation, ENPO, Naga Women Union, Manipur, NPMHR, Nagaland Joint Christian Forum aser UNTBA nungi lenirtemia jembia liasü.