Congress-i K L Chishi aser Alemjongshi na nem party ticket agütsü

Kohima, March 21, 2019: Brihostibarnü Congress Bhavan, Kohima nung Congress candidates- KL Chishi aser Alemjongshi Longkumer na den NPCC lenirtem tangokba noksa nung angur.

Kohima, Metsüremi/March 21 (TYO): Brihostibarnü Congress-i taoba mapang Chief Minister, K L Chishi nem Lok Sabha menden atema INC ticket agütsü aser Alemjongshi Longkumer nem 26-Aonglenden Assembly Constituency bye election atema party ticket agütsüogo.
Tanü Kohima nung aliba Congress Bhavan conference hall nung sentong ka ayongzüka agidang Nagaland Pradesh Congress Committee (NPCC) Tir, K. Therie-i tena nem party ticket agütsü.
Party nung inyakertem aser lenirtem den jembidang Therie-i, “Nagaland nung Congress tesüiba küm 15 tashi timtemogo. Joko mapang tatsüka nisungtemi asenok sendoka liasü, ajisüaka state nung sorkar tashi angutsü nükjidong nung tangbo asenok tashi taitba kümdar,” ta metetdaktsü.
“Taruba Parliamentary aser Assembly menden atema bye election ya tanga party masü saka Congress aser BJP na tsüngda tangatetba balala tetoktepba ka lir,” ta pai ashi. Iba dak sendakba nung pai, NDPP candidate ya PDA sorkari shimba lir, kong BJP-a densema lir, ta ashi.
Pai ashiba agi, BJP-i Hindutva prokba ajanga tribal nisungtem jenjang raksatsütsü atema kanga meranga inyaker aser kangshia Citizenship Amendment Bill benoktsü meranger.
“Bangladesh nung Hindu nunger nütsüng crore 2.18 dak tema lir aser BJP-i parnokji anir arua North East nung lidaktsütsü meranger, koba ajanga lisopurtem maitsü raksatsü,” ta pai aitsü.
BJP Tir, Amit Shah-i par party-i tanaben sorkar tashi anguba sülen CAB benoktsü ta sangdongogo, ta shia Therie-i, iba ya odiodia tayongzükba ka lir aser tesem nung aliba nüburtem mezüngmeshiba ka lir, ta ashi.
Paisa, state nung ruling NDPP-i sorkar tashi nung alitsü atema BJP tangatetbatem aser mapatongtem agizükba ajanga Nagaland yokshir, ta aitsü.
Ajisüaka NPF aser NCP-i telemtetba magi, ta shia pai, Congress-i CAB, secularism aser yimtenren ken otem nung külemi longjemer nokdaktsü parnok dang mepishiogo, aser kobi melii parnoki telemtetba tajung agitsü, ta metetdaktsü.
Naga yimtenren onük nung Therie-i, Naga nunger atema RSS aser BJP tebilemba onük tajung mali, kechiyong parnoki linük tesem ajaklen Uniform Civil Code benokner, ta ashi.
“Naga nunger aser Northeast tebilemtsü onüktemji Congress-i dang angateta lir. Anungji Congress-i dang secular kümzüktettsü, anungji Congress candidate nem vote agüjang,” ta pai ashi. Therie-isa party nung inyakertem dang tesüiba mapang tejashibatem amadoker INC candidate anapronglai takok angutsü atema longjemer kanga meranga inyaktsü ayongzük.
Paisa lokti tentet balala, melungtet teloktem aser Naga lokti nung shisashirtem dang, Naga lokti ajungtsü atema bilemra communal aser fundamentalist anema vote agüjang, ta mepishi.
INC Parliamentary candidate, K L Chishi-i, election nung pai takok ngura pai Nagaland nung alirtem taginüba ataloktsütsü atema inyaktsü aser tongtibang onük pezü- State onük ana aser National level nung onük ana atema inyaktsü, ta metetdaktsü.
Item onüktemji- Central level nung Naga yimtenren onük latettsü aser Citizenship Amendment Bill na lir, aser state nung Naga nunger lanurtem atema mapa aser terenlok onüktem lir, ta pai metetdaktsü.
26-Aonglenden candidate, Alemjongshi Longkumer-i, Mokokchung district nung Congress party jenjang junga lir, ta shia tanga candidates asem anema tokteptsü atema NPCC Tir aser par team dang akokba tashi yaritsü mepishi.
Alemjongshi-i, pa atema healthcare ji tongtibangba asütsü, lanurtem atema shisaliok tajung aser mapa agutsütsü atema inyaktsü, iba dak alia rongsenkettsüng nung terenlok atema inyaktsü, ta metetdaktsü.
Iba sentong ya NPCC working president Khriedi Theunuo leniba nung agi aser Rusoma Baptist Church Pastor, Kholie Chase-i sarasadema sentong tenzük.
General secretary Capt G K Zhimomi-i lokti pelaa agizükba o jembi, Associate Pastor Sumi Baptist Church Kohima, Khekavi Yeptho-i meshiteta sarasadem aser NPCC vice president, Jonathan Ao-i tepela anküp o jembia liasü.