Cricket asayar Gambhir-i BJP nung aden

New Delhi, Metsüremi/March 22 (Agencies): Taoba mapang India nunger cricket asayar, Gautam Gambhir-i tanü Bharatiya Janata Party (BJP) nung denogo; pai taruba Lok Sabha election nung tokteptsüa akok, ta osang angazüker.
Party nung pelaa agizükba mapang nung BJP lenirtem Arun Jaitley (Union Finence Minister) aser Ravi Shankar Prasad nati Gambhir-i inyaktetba mapatem atema pa nem tenüngsang agütsüogo.
Gambhir-ia linük tenzüktsü atema party lenirtemi pa nem maongka agütsüba atema pelaba lemsatepa liasü.
“Asen Ato kilonser aser pa mangdang ajanga ni kanga ajungmesor. Cricket tsütsü linük atema ni akokba tashi inyakogo, aser tang yimtenren nunga ni India atema kü tajungtiba inyaktsü imlar,” ta pai metetdaktsü.
Taruba Lok Sabha election nung Gambhir-i Chandni Chowk constituency nungi tokteptsüa akok, ajisüaka Jaitley-i, iba telemtetbaji BJP election committee-i dang agitsü, ta metetdaktsü.
Social media nung arishi küm 37, Gambhir sapurtem jenti lir, anungji parnoki yimtenren tsütsülena pa nungita yaritsü imlar.
Pai küm 13 tashi international jenjang nung cricket asayaa aruogo aser 2011 küm India-i World Cup takok anguba nunga paia tongtibang shilem agia lir.
Test centuries 9 aser ODIs nunga centruries 11 ngutetsang Gambhir-i Padma Shri award-a agizüka liasü.
Yaküm December ita nung pai cricket asayaba nungi anisüngzüktsü, ta sangdonga liasü.