NPF purtemi party candidate Toshipokba Lkr akhümketa agizük

Ungma, March 22 (TYO): March 22, 2019 nü Ungma yimdak 26 Aonglenden sanger nisung meyirijang aika den Naga People’s Front (NPF) party pur state level, division, Assembly Constituency aser unit party lenirtemi 26 Aonglenden A/C bye election nung tokteptsü alisang NPF Candidate Toshipokba Lkr akhüm tulu agüja meraketa agizükba osang ka ajanga metetdaktsü.
Pa agizükba sentong ka Ungma yimlang Aonglenden nung agidang, NPF Candidate Toshipokba Lkr den NPF Central Farmer Wing President Lanukaba NPF Mokokchung Division President Moasangba Jamir, NPF 26 Aonglenden A/C president Chungshi Lkr, Ungma yimden nungi Obangtiba Tatar parnoki shilem agia liasü. Sentong nung Ungma arogo tenzükeri ticket meshiteta sarasademtsü mapang agia liasü ta angazüker.
Toshipokbai iba sentong nung jembidang, tia kar maka küm ter tsüngda election pungu (5) ajuruaka nüburtemi machimajem aser timtem arema yaritsü temulungtetba angudang tepela agi nüktzü alur, ta ashi. Dr. Watizülui NPF ticket meraktepi tangatetba tanela agi yimli tulu agütsüba asoshi paisa pelaba shisem, ta kasa osang ajangasa metetdaktsü.