India-i tashiyim amshiba ajanga Indo-Naga tebilemtsü adok

March 22, 2019 nü TPC Kohima nung 64 buba Nagaland Republic Day amungdang FGN president Gen (retd.) Viyalie Metha aser NNC president Adino Phizo na den tangartem agiba noksa ka angur.

Kohima, March 22 (TYO): India-i Nagaland atsünga agiba ajanga tang tashi Indo-Naga tebilemtsü mekokteti arur, ta Hokolbarnü Naga National Council and Federal Government of Nagaland (NNC/FGN)-i metetdaktsü.
Transit Peace Camp nung 64 buba Naga Republic Day amungdang FGN president ‘general retired’ Viyalie Metha-i ashiba agi “tang mesüra tatsüka lir India-i Nagaland nungi sepaitemi agientsü. Iba mapa ya India-i tekaratiba nung inyakra parnoki atema tajung asütsü.”
“1964 küm sorkar ana tsüngda sign asüba Ceasefire Agreement nung FGN-i ammeta lir. Telemtetba tajung ka agitsü alizüng yur iba tenangzüktep nung sign sütep,” ta paisa metetdaktsü.
“1832 küm British nungeri Nagaland telungi aitba ajanga Naga nunger taküm libaliro nung kongshi. Küm 48 tashi raraba sülen 1880 küm tebang agi angatettepa parnok Naga nunger li kar nung lidaktsü,” ta Mehta-i ashi.
“British nungeri Nagaland toktsür aoba mapang Naga nungeri parnoki agütsüba Reformed Scheme magizük aser 1929 küm Simon Commission dangi memorandum ka zülu. Iba nung British nunger marudang Nagaland aliba ama dang alitsü ta jangjajangja shia liasü” ta paisa shisem.
“India nem nüjiso agütsüdang A. Z. Phizo-i anir Naga lennirtemi Mahatma Gandhi-i anir tanga India lennirtem den ajurutep. Parnoki India aser Nagaland tsüngda kidanger ama tesentaktep tajung ayutsü atema India lennirtem den ajurutep aser ajaki mulungtepa Naga nungeri August 14, 1947 nü Independence sangdong” ta Mehta-isa metetdaktsü.
NNC-i May 16, 1951 nü Naga Voluntary Plebiscite agi aser iba nung 99.9%-i shilem agi, ta paisa ashi.
“Plebiscite takok ngua agiba ajanga India lennirtemi Naga nungeri nüjiso aginüba tazünger kari dang masü saka Naga nunger ajaki aginür ta metet. Ajisüaka, India-i jungjunga meshisadangi 1954 küm nungi tashiyim agi Naga nunger madak yimsü asütsü tenzük” ta Mehta-isa metetdaktsü.
Iba tensa ajuruba ajanga Naga nungeri sorkar ka kümtettsü telemtetba agi aser March 22, 1956 nü Rengma region kübok Parashen nung NNC tentet. Iba ya Nagaland indang Yehzabo (constitution) kübok tentet, ta paisa shisem.
Tanü sentong nung mendenji Deputy Chaplee Kilonser Zehonol Tetso liasü, Rev Dr Vevo Phesao-i Lai azüngba den temoatsü meshia sarasadem aser FGN chaplain Col. Withonang-i tenüngsang agüja sarasadem. Sentong nung NNC president Adino Phizo aden.