PDA-i elections atema nüboyimba mapa tenzük

26 Aonglenden Assembly Constituency bye election aser Lok Sabha election atema PDA-i shimba  candidate-tem asoshi campaign tenzükba sentong ka Ungma yimdak akadang PDA telungjem nung tongtipurtem den party lenirtem külemi tangokba noksa nung angur. Ungma, March 22, 2019.

Ungma, March 22 (TYO): Aruya aliba 26 Aonglenden Assembly Constituency bye election aser Lok Sabha Parliamentary election atema PDA consensus candidate Sharingain Longkumer aser Tokheho Yepthomi na atema campaign maparen March 22 nü yangi Babu Tzüpu Amphitheatre Ungma nung tenzükogo.
Tanü iba sentong nung Nationalist Democratic Progressive Party (NDPP) Tir aser People’s Democratic Alliance (PDA) Mendenbuba Chingwang Konyak, Nagaland Chief Minister Neiphiu Rio, Deputy Chief Minister Y. Patton parnoki anir par külem Minister, Advisor-tem, party lenirtem aika arua shilem agia PDA candidate-tem atema nübuyima o balala jembitsüogo.
Tanü iba sentong nung NDPP tir & PDA mendenbuba Chingwang Konyak-i jembidang, Nationalist People’s Party (NPP) legislator ana – Imnatiba aser L. Khumo na NDPP nung arua züklokba atema pelaa agizükba mezüngbuba metetdaktsü.
Yimya agi election nungji ticket-ji aikadi meshitsüa akok, aji saka, lenla ajak asadanger aser ajaki mulungtepa PDA consensus asütsü atema NDPP nungi dang Sharingain Longkumer aser Tokheho na PDA consensus candidate asütsü shimogo, ta ashi.
Nübur terenlok aser yimchiyimjung asoshi lenir tajung nungdaker aser tang PDA sorkarji manokshii tashi ita notaka lir. Anungji, ruling sorkar aser PDA candidate nem vote agütsütsü asoshi paisa mepishia ayongzük.
Nagaland CM, N. Rio-i jembidang, NDPP ticket-ji nisung asemi meshiogo, saka ka nem dang agütsütsü asünung, Sharingain Longkumer nem agütsüogo. Pa ya lanur ka dang aser tarutsü atema pa dak nükla tajung angur, anungji, Naga nunger lenir ka kümdaktsütsü teimla nung pa nem ticket agütsüogo, ta ashi.
Opposition Naga People’s Front (NPF)-i tanü tashi Lok Sabha election atema parnok candidate meshimteter. Tangji par party telung nung rongrong tulu aliba angashir. MLA 26 tashi aliba party kati candidate meshimtetbaji kechi? ta paisa asüngdanga ashi. NPF-i par candidate meshimtetra tatem nungbo NDPP candidate asemtsüsa akümtsü, ta paisa shisem.
Citizenship Amendment Bill (CAB) onük dak sentakba nung taoba mapang Chumukedima nung lenla ajak abensaa senden ka jatep, aji saka iba senden nung Congress aser NPF bo maden, iba tetezü parnoki nübur atema bilema maliba aser parnok dak mangdang maka sayur, ta paisa ashi.
CAB ya Parliament nung pass süaka Nagaland state bo iba jagi mekongshir, kechiyong Nagaland bo Article 371 (A) aser ILP regulation agi kümzüka lir, ta paisa jangjashitsü.
Taruba central sorkarjia BJP-i aniba NDA sorkarsa arutsü ongko adokogo ta, pai ashi.
Paisa Naga yimden tebilemtsü indang olen kar shipokdang, Naga yimden keno dak sentakba nung NDA sorkari temulung kanga agütsür aser 2015 küm 3rd August nü koba frame work agreement ka renema lir, ibajia NDA sorkar mapang tekaratiba nung tatembang kati arutsü imlar, ta paisa shisem.
26 Aonglenden Assembly Constituency bye election atema PDA telungjemi mulungtepa PDA-i shimba candidate asütsü Sharingain Longkumer shim, aji saka, PDA telungjem nung aliba Nationalist People’s Party (NPP)-i teloki mulungba anema 26 Aonglenden A/C bye election nung par candidate asütsü NPP ticket agütsü, anungji iba tejashi nung NPP legislator ana NDPP nung züklok, ta Rio-isa kuli kar ashi.
Sharingain Longkumer ya 26 Aonglenden A/C bye election nung aser Tokheho Yepthomi ya Lok Sabha nung MP atema tokteptsü. Tena ya PDA-i shimba candidates lir aser tenaprong ya NDPP ticket nungi tokteptsü. Sharingain Longkumer ya taoba minister asür, Nungshizenba Longkumer aser Pangerla na jabaso lir.