Pei tamang agi aliba

Alima nung Khristan taküm ka asoshi oxygen-ji tamang ya lir. Tsüngrem dakbo amanger amai saka metetsümonga kecha tarendak melii Tsüngremi memulungba inyakbaji Tsüngrem dak mamangba tamaitsü lir. Kodang asenoki Tsüngrem dak junga mangmangtetlir, asenoki tangar akaba nung tenük meremtsü aser tamajunger sülen anidakbajiang shitaklen anidaker ama küma aotsü. Akhi tejen putu nung Yerimia, Ezekiel aser Habakuk nungertem aliba mapang, Tsüngrem anemba kini dang tongpang nung takok angu, parnokjiang takar küma jangratema ali. Parnoki tashiyim aser mashilen nungi bendenba rongsen agi kiojen yangluba ajakji temoatsü ama züngshia pelatep. Iba amaji Tsüngrem dak amangertembo aazükaru masür aser takoka mangur saka mamangertemang alima temoatsü manung jangratema alir ta asüba putu ka liasü. Ibayongji, item ainkertemi aiben Tsüngrem dang dena rasa aser kechiba temeshipur timtem ajurudang, temenenpurtembo azükarur ta asüngdang, Kasa tejashi nung ainker Habakuk-i Tsüngrem dang Tsüngrem anemertem nemang kechiba takok agütsür aser kechiba parnok mapatemji menokdanger ta asüngdang. Ajisüaka, Tsüngremi pa dang ” Temeshipurtem pei tamang agi alitsü,” ta dang ashiba Habakuk 2:4 nung shia angur. Habakuk nunger sülen Yisu alimai aruba osangtajungjia iba ya dang liasü. Atangji, temeshipurtem ta asübaji kotak tenyar ama kenyongi tai maket temeshi nisungtem alima nung alitsü ta imlaa ashirba masü, saka Tsüngrem dak amangertem shirnoki teti Tsüngremi moatsütsü, Tsüngremi aneptsütsü aser Tsüngremi inyaktsü ta tamang kateta Tsüngrem anasa alitsü meranger, parnokji Tsüngrem tsüngdang temeshipurtem lir. Parnokji tanüla nung yaa tsüraa aser anünga alirtem lir. Kotak yimliji parnok meyong ta Yisui ashiba asenoki Tasen Lai nung angur. Alima nung kechi atalokdir atalokaka Tsüngrem sentong ataloktsü asoshi ataloker. Iba jagiang, Apijemtsü Shin nung ashir, nisung tamajungertemji tamajung anogo asoshi yanglu. Aji oda, kodang Israel nungertemi Tsüngremi ashi manga, parnok merenshitsü atema Tsüngremi Pa dak mamangba kin Babylone nungertem nem tashi agütsü. Yirusalem yimti tashi amaktsüsa Nebukednazeer chuba nem Tsüngremi tashi agütsübaji, Israel nunger ainkertemi mangatet, saka Tsüngremi Pa sentong ataloktsü asoshi Israel nungertem madak inyakba mapa ka liasü. Tanü asenok tendaka, kasa Habakuk nunger mapang amato, tamajungertemang jangratema alir aser tajungertembo timtema pei tebok mesüngtet alir ta asüba tensa tia angur. Habakuk nunger mapang amato tashiyim inyakertemiang takok angur aser azü tokshirtemang takar akümer. Ajisüaka, parnok dak tamajung atalokba kecha mangur. Tamangertemi asen lima item tamajungtem nungi kümzüktsü asoshi asentenshi meshir saka asentenshi masür. Ya kechiba ? Tsüngremi tamangertem sarasademba ya mangashir asü ? Tamajungertemi tashiyim aser ochimashi inyaka takok anguba aser takar akümba ya dang shitak asü ? ta aiben tamangertem mulungjang nung Habakuk nunger ama nemnema alitsü. Ajisüaka, Tsüngremi ashir, itemji kü sentong ataloktsü asoshi inyaker. Tamjungerji tanü ama tamajung anogotem asoshi yanglum, anungji parnok takok aser rongsenji tenükshi. Itemji kopi melii ayi aser süngolio ama akongtsü aser kenyongi alima nunga melidang ama samadoktsü ta T.Ken 37 nung shia angutsü. Tanü ama tamajungertem aienba mapang nung tamangertem mapaji Tsüngremi parnok asoshia anogo tajung ka agütsütsü ta amanga aremzüka atatsübaji lir. Ano matalok saka Tsüngremi ataloktsütsü ta arema tamajung nem mekokdaktsüi atabaji tamangji lir. Ibaji kodang anagtetdir, Habakuk-i ashi ama, tamakok anguyonga aser sensak tiai aiyonga, Kibuba dak teti pelaa alitsü ta asenoki shitettsü. Kechiyong kodang Tsüngremer mapangji arudir, idangjibo asenoka Tsüngremer tashi nung pelateptsü. Tamang ajanga Kibuba nungi takok aser temotsü angubajibo tzü agi tzüyim asüng ama, asen lima aser asen taküm Kibuba tashi aser shisatsü agi asüngtsü. Ibaji asenok tamang aser Tsüngrem sentong lir. Habakuk 2:14.