Tim-a ta bilemra yamai melenshia inyaknung ajungtsü asü…???

~ L.Kika Pongener.

1. Tenla kidang shilem agir ajunga nem teka mahloktsüba ya akhi putu nung shilem agiteter shinga malidang benshiba yimya ka lir, saka tanü putu nungbo kanga-bo mebenshir. Shilem agir ajunga nem teka mahloktsüba jagi tekulem masü, lokti mongdang ka dang mesuka akümer. Anungji joko iba yimya yabo melenshinung koda ? Kokrabang tekulem yabo sungjem-sungjema kulemtsüla.
2. Tenla kidang chitentsür nubentsür-temi kinu tanür anir tejaklen wajak nung mamentsüla. Yimya agi kinu tanürji mapang shia tzü endoknur, jana-onur. Anungji idangji tangar nem timtem agüja luli-atuli ta masütsüsa tesulen amentsüla. Ano tanür anir amener tetsü-temi tanür ola adoka tashi agi jepra tekulem jangjongmara masütsüsa awashi meteta yakta kimai anir alutsüla.
3. Tershilem, temoatsü tenla, tepela tenla, ki meshitetba tenla, Gari meshitetba tenla etc. item tenla ya itashia adok nung tenung tejangja adoktsür asünung-ji, tenla sen saruba mapang nung mapang endoka zünga mashiyongjia, tenla sarua arudang molok nung enoktsü nung majungtsü  no  ?
4. Special program nung tepela & tayongzükba o jembirtem nem minute 5-7 agütsüba minute 10-15 tashi agiba ya kanga majung, Aor tesa sentepdak-bo English oshi agi mapang endoka meyipa shia mejembiyonga ajungtsü sudi ta bilemer, oda olong tasak kar Ao agi meshitetba dak alaka.
5. Tanürtem Sunday  School, Sports & Damasa, yamala  nung takok angurtem nem sempet alemba ya Tenla kidang masü, saka tanga tesem kar nung agütsüba tajungba asütsü. Kechiba sura sentep mapang shitak nung metenzükteter aser talangka menua alitsüsa akümer. Akok tashi  agi tekulem sentep yabo kanga dang pentet-penteta tanga kecha agia jangjongmara mesui agitsü merangtsüla.
6. Tekulem sentep nung ‘Special Program’ agidang sentong tarensen kanga talang, mesui akok tashi teloki malaktsüsa tatsütiba nung agitsüsa yanglutsüla. Kechiyong tantsür-tambur balaka teberem agi mapang talangka amentsü maremteti kanga tim-atemer aser metsü-meshi onur.
7. Tenla kidang sentep mapang nung Skit, Jiloshi, Tsüngsangba, ken atenba, kongki ola tapu balala kechisa amshia shilem agidir, khristan  jakla – yimya  (Christian Spirit)  nung dang ayitsüla. Talisa Hindi Cinema ken, Rock ken aser Western Culture khristan tekulem den mapetba-bo maitsüla.
8. Asü – pila sentep (Funeral) nung lokti balala-i shilem agia jembi-dang, mapang talanglang jembiba ya majung. Asür indang ochi taküm kuli tongmelang agi tatsüka ashiba dak alaka, lepko-mung dak maketba kipok o  mejembitsüla. Asü-pila sentep ama nung mapetba o mapang endoka jembiba agi lepko-mongertem temulong yirudaktsür aser tejembir-jia mashimalu mangatet tali shisanger.
9. Asü-pila sentep (Funeral) nung  Sungpo züngar, Kin- kidong, Mepo-sanger, Pensioner aser itemla mesukba telok kar-i senotsü  teyari ‘Envelope’ ka agütsütsü mechi nung, mapang meshia nokdaker shilem magiyongjia kipok nung asür kinunger-tem nem agütsüyonga majungtsü  na  ?
10. Tebutem, tetsütem, lanurtem aser tanürtem anogo amala nung sentep metenzükdang parnok atema bendanga agüja sarasademtsütsü nisung kar nem agütsür. Anungji joko tekulem sentep atema shibai sarasadem-dir lepshia parnok atema sarasademtsü menungdaker. Tekulem atemaji dang sarasadem asütsüla. Saka karibo ano lepshia mapang endoka parnok atemaji sarasademer aji melenshitsüla.
11. Pensioner ka-ji maparen ajak nung küm aika tenzükshia tenzüka arur joko anisungzüktsü mapang. Anungji ‘Pensioner Union’  telok aika tenteta moi, sorkar den tongteprateptsü atema District shia ka-ka alitsü, aser tanüngba kongsangtem yabo maliyonga majungtsü no  ?  Kong telok-tentet lidir idakji saru, nubotsük, meeting-sitting lir. Joko tain kümadoker timtemang bendenloker  masü  na ?
12. Tanü ama alima takong tensa tia ka nung lokti-tentet tuluba nungi shir tilaba tashi khangtepa saru sarua jubilee mungtepba ya anentsüla. Oda kanga tongtipang telok arogo, yimten aser lokti tulu koda mepaitoktetba kar dak alaka, tanga tila-teri telok-bo  jubilee ya mamung tajungba masü na  ?

          Oda benjong tulu-sa mali-yongjia sentong tilaka agia sarasadem mapang ka aginung majungtsü  ?

13. Tanü Arogotem nung benjong-bentsü, longso-longben ya tera ajemtsüla. Talisa Christmas mapang, Ak tulu tepseta tenzükertem/tenzüklatem shilep tulu-lu alemba yimya ya melenshitsüla. Hau, arogo ajak nung-bo mebenshi-i alitsü sudi… Saka arogo kar nung danga benshia lira melenshi nung koda ? Kechiba sura arogopur-temi mission mapa inyaktsü aser arogo taküm alitsü asoshi tershilem tenla & tamang tenla bendenba agi chidiyungdi mapa nung arogo rongsen endokbaji tobur kanga majung.