Merüka agiba election

Asen lima nung election jungjunga shitak aser merüka agitsü asoshi ajungshitep tenzüker küm ishika arudagi. Talisa taoba assembly election ana nung arogo aser lokti tentettemi election merüka agitsü asoshi kanga meranga inyaka aruogo. Atangji, yamaji merangaka election merüka magitet, anungji aikati election merüka agitsü ajungshirtem atalatsür aser ano külen tajungshirtema tezü atanger. Ajisüaka, tang tashi nung Nagaland nung election merüka agitsü jembia arubaji metsü proker amai dang lir, anungji proklibo ruzüka mechitettsü. Asen lima ama taoba küm aika sen agi, yi agi aser tashiyim agi election nung akoktsü meranga aruba lima ka manger sangwa nung melenshitsübaji kanga tasak lir, anungji apuso mapuso ka akoktsübajibo otsü maka. Ajisüaka, election merüka agitsüla ta jembiba kijajia tang asoshibo asenok atema takok tuluka asütsü. Atangji, taoba state general election ana aser Lok sabha election-a ana nung nisung aikati pei vote peisasa pei angatetba nung kanga merüka inoktsüogo. Election mapang election-i aiertemi mesüzüka vote agütsütsü atema sen agüjaka nisung aikati magizükba otsü lir. Ano, nisung aikati tangar vote enoktsütsü koka liaka, pei vote dang peisasa enoktsür election nung merüka shilem agirtem rongnung dena kuli asüba purtema aika lir. Tesem aika nung tsüraburtemiang lanurtem dang election nung timi shilem agitsü ajungshitsü melen tanurtemiang tsüraburtem dang election mapang sen memeshitsü aser pei vote peisasa timi enoktsütsü asoshi ajungshia shilem agidaktsüba osang angashiogo. Election ya taküm nung khen dang ajurutsüba sentong ka masü saka küm pongo shia ajurutsü, anungji election agi shia tajungba aser temerükba agitsü merangtsübaji senso ka tangatetba aser temulungtetba asütsüla. Tanga April 11 nü election ka agitsü anogo anasai arur. Iba ama mapang nung arogoi dang masü saka lokti aser yimten lenirtemi anir election merüka agitsü nüngdakba indang jembitsüla. Election merüka magi tashi asen lima junga merenloktsü aser talisa lanurtem jenjang tamajungba akümtsü. Election merüka agiba agi nübortem dang masü saka election-i aiertemang tajangzük tuluba angutsü. Ajisüaka, election nung tokteper aikati election merüka agitsü jembiba ya maginür. Tetezü election nung yabo takok tashi nübortem vote sen agi alitsüla aser akok tashi tashiyim agi akoktsü merangtsüla ta item purtem jagibo angatet südi. Ajisüaka, election ya nübortem asoshi pei tata temeten amshia yimsüsür shimba mapang aser election nung toktepertem asoshi election ya pei ajung kenyongi masai nübortem ajungtsü asoshi dang bilema nübortem tenzüktsü asoshi yimten tashi aser hadir bushiba mapang ka lir. Aji oda, tang ama election mapang atongdang yimten teloktemi pei pei telok ajung asaa jembir aser külen arogo aser lokti tentet balalai election merüka aser junga agitsü indang jembir ta kati ka nem tangatetba tajung agütsütsü meranga election agira, asen lima nung memenui election kanga merüka agitettsü. Tangbo Reverend-ia proxy vote agütsütsü maaker aser arogo tenzükertemia pei vote ayoktsü kecha marendaker. Ajisüaka, asenoki asen lima jungdaktsütsü atema teimla mesamai election merüka agitsü nüngdakba indang ya jembipet jembira, memenui kecha memetet temeyongang anemsangia proxy vote agütsütsübo aaktsü aser senyong vote agütsütsübo tebilema mebilemtsü. Asen lima nung election merüka agitsü jembiba ya election merüka agitsü tetenzüker ta asenoki angatetdi aser election agi shia tajungba aser temerükba shilem agitsü merangdi. Atangji, asenok aikati election nung shilem magir, kechiyong asenoki election ya temenena ta bilemer. Ajisüaka, election ya temenen mapa ka masü mesüra election-i aibajia Tsüngrem anema inyakba mapa ka masü, saka asenoki election mapang meshitaki inyakbajiang tai aser temenen asütsü. Arungma, asen lima election merüka agitsü asoshi ano khen asentenshidi. Ano, khen Clean Election nisan to ajungketdi aser ano kken nangzükshidi.