Woodland Nursing Home nung Fibro scan angati sütsütsü

Dimapur, Metsüremi/March 26 (TYO): Mokokchung yimtsüng kübok Tsusapang kiyong nung aliba Woodland Nursing Home nung March 27 nü angati Fibro scan (Liver Scanning) camp ka ayongzüka akatsü.
Mozüki ketdangsertemi ashiba agi, Fibro scan asütsü kanga nüngdaker kechiyong India nung temesen tashidak agi asür aika küma odar aser iba aso nung alirtem atema iba tashidak ya tamajungtiba ka akümtsü ana nung lir.
Parnokisa, temesen tashidak ya yi, temang tozük tali kümdaktsüba aser viral hepatitis (B&C) aser temesen yiruba ajanga adoker ta ashi.
Iba dak sendakba nung parnoki ashiba agi, Fibro scan asüba ajanga tashidak tetenzükdang putetba nung teyari agütsüba den tashidak takaratiba nung anepaluteter aser tongtibangsa temesen tashidak balala tamajungba küma mao tsüngda taneptsü agütsüba nung teyari agütsür. Maneni Fibro scan dak lendong keta mali aser tashidak shidak puteter, kechiyong iba ya invasive test ka lir aser iba ajanga biopsy agitsü nüngdak madoker aser mozüki nung monga kazütsü nüngdak madokba den mapang tatsüba agir, ta parnokisa ashi.
Iba camp ya Fourrts Company den longjemer ayongzükogo. Iba company ya taoba küm 40 tashi India nung health care sector tsütsü Pharma Industry nung temaba jenjang nung aliba company ka lir. Fibro scan asüba taah ya India nung sen 7,000 lir, ajisüaka camp mapang registration ama scan shia sen 100 dang agitsü, ta ketdangsertemisa metetdaktsü.