FAC nung Functional English agir kaketshir nem tenüngsang agütsüba sentong katsü

FAC B.A 6th Semester Functional English kaketshir par pezü nem tenüngsang agütsüba sentong ka ayongzüka agir külen, special guest Akok Walling den HOD, FE Dept. Imsunaro Ao-i anir FE tesayurtem külemi tangokba noksa nung angur. Mokokchung, March 26, 2019.

Mokokchung, March 26 (TYO): Fazl Ali College (FAC) Mokokchung nung Functional English Department-i ayongzüka Functional English agir B.A 6th Semester pur nem tenüngsang agütsüba sentong ka March 26 nü FAC conference hall nung kaogo.
Iba sentong nung Special Guest, taoba FAC Functional English HOD aser taoba Dimapur College Principal, Akok Walling-i jembidang, telok nung o jembitsübaji temela masü saka tanü Functional English graduate asürtemi tsüngro songa satoksatoka iba amai nema tanga jembitetba ngua pelar, item ajakji tesayuri meranga sayuba den kaketshirtemi nentaka angazükba ajanga lir, ta ashi.
College azüngdang tatidang nung takok anguba kisüng jagi teperi makümer, anungji, züngzüker külen asen takümji kechi asütsü ta bilema angazüktsütsüla aser nai angazükbatemji taküm nung mapa küma inyaktsüla, ta paisa kaketshirtem ajungshia liasü. “Züngzüker külen nenoki mapa bushitsü masü saka alimai na bushitsüsa angazüktsüla”, ta paisa shisem.
Graduate sürji joko ojang ta masü saka angazükba nungbo manitsüla aser maneni angazüka tajungba akümtsü merangtsüla, ta paisa inyakdaktsünüba o ka ashi. Oshi (language) yabo tanga oset amai masü, koma teimba angazüka amshidir yamaji tajungba akümer, anungji, tajungba akümtsü asoshi angazüktsüla, jembitsüla aser zülutsüla, ta paisa shisem.
Oshi ya meimchir asoshi kanga dang tongtibang tongtiret ka lir, iba nung ya loktiliba ajak sentaka lir. Anungji, oshi (language) sayurtemi aser kaketshirtemi oshiji kanga nentaka angazükba den kümdanga sayutsü/zülutsü asoshi paisa tatishitsü kar bener arua lemsatep.
Taküm B.A 6th Semester nung Functional English renemertem parnok pezü (4) liasü. Parnok rongnung nisung ana All India Radio (AIR) nung inyaktsü aser nisung ana Town Higher Secondary School Mokokchung nung tesayur inyaktsü asoshi Internship Certificate nguogo.
FAC ya Nagaland nung tejentiba govt. college ka lir. FAC nung Functional English ya 2001 küm Akok Walling mezüngpur sür pa lenisüba nung iba department tenzük. FE ya vocational subject ka lir aser North East nungbo iba subject (FE) ya FAC nung dang agütsür. Tenzüker tanü tashi arudang Functional English agir kaketshir aika Nagaland aser tanga state-tem nung mapa balala inyakba osang ajanga angazüker.
Tanü iba sentong nung HOD, Functional English Department Imsünaro Ao-i mapang tatsüka agia tarurtem pelaa agizükba den par FE department inyakyim indang kar rateta ashi. B.A 4th Semester nung azüngertemi ‘Holding on together’ ta sür ken tajung ka tenloktsü.