Traffic tebilemtsü atema Chief Secretary leniba nung senden amen

Kohima, March 27 (TYO): Kohima jila nung traffic tebilemtsü atema March 26, 2019 nü Chief Secretary indang conference hall nung senden ka ayongzüka menogo, ta tanü ketdangsertem osang ka ajanga metetdaktsü.
Kohima Municipal Council (KMC), Transport Dept, Traffic Police Dept, Kohima Village Youth Organisation (KVYO) nungi züngsemtem, Home Department, DGP-i traffic tebilemtsü atema tebilemba onük balala lemsatepa liasü.
Chief Secretary, Temjen Toy-i, Kohima jila nung traffic tebilemtsü bentettsü atema tim departments ajaki longjemer inyaktsüla, ta ashi.
Paisa, public transport inyakyim melenshitsüla, gari anena ayuba tesemtem lemzüktsütsüla aser gari anena ayutsü atema tesem tilaba lemzüktsütsüla, gari parking yanglutsü atema tesem jangjatsüla aser traffic ozüng alema inyakertem nem e-challan agütsütsüla, ta ashi.
Kohima Traffic Police aser lokti tentet balala nungi züngsemtem aser department balala nungi ketdangsertemi traffic tebilemtsü dak sendakba nung parnoki reprangtetba lemsatepdang, gari timi manishiba aser ozüng alema gari anena ayuba indang metetdaktsü.
Parnokisa iba tebilemtsü koktettsü atema tebilemba lemsatepba den külemi tim ketdangsertem dang meranga inyaktsü ayongzük.
Taruba anogo sihika tsüngda tim departments aser KVYO ama melungtet teloktem ajurua senden ka amentsü aser traffic tebilemtsü bentettsü atema mapatong kar renemtsü.
Senden nungsa Kohima DC-i gari lenmang tiplen kisüjensüba osettsüset yua aliba agientsü atema tuyuba dak sendakba nung o lemtepa liasü.