Canada nung Tialila indang sangro ana saya

Guwahati, Metsüremi/March 30 (Agencies): World Poetry Day benjungmung March 21 nü agiba mapang Vancouver, Canada Moberly Arts and Culture Center nung Naga tsür sangro zülur, Tialila Kikon indang sangro ana – ‘One Sky’ aser ‘Petrichor’ saya liasü.
Iba sangro ana ya taküm küm tetenzüklen ni züluba sangro pungu koba shortlist süa aliba tem rongnung Writers International Network-i shima liasü, ta Kikon-i ashi.
Kikon ya Dimapur nung alir aser lai meimchir, taküm aser temeim onük tapu balala indang nung ajemdaker sangro zülur. Arishi küm 45 tain Kikon ya 2018 küm Instagram nung ‘100 most incredible instapoets’ jenjang nung züngoksema liasü.
Sangro jangrartemi la indang official Instagram https://www.instagram.com/soulscape73/?hl=en ajanga lai züluba sangro tajungtem angutsü.
World Poetry Day benjungmung sentong nung tan agi Moberly Arts and Cultural Center nung St Joseph’s College, Jakhama nungi graduate asür par asem indang sangrotem sayaa naroküm bener asutsüogo. Mezüngji 2016 küm aser 2018 küm tanabubaji liasü. Taküm küm-a iba College nungisa graduate student, Kikon indang sangro ana tashi sayaogo aser laji tasembuba asütsü.
Mapang talangka atema sango balala meima arur külen, Kikon-i la indang mezüng sangro ‘Humans Beings As We Are’ saya liasü. Poetry First Publishing International-i la indang ‘Human Beings As We Are’ sangro ya ‘top 100 poems of 2015’ jenjang nung züngoksema liasü.
2016 küm Kikon-isa ‘Paper Cranes’ ta nüngja agütsüba sangro adoktsü.