Rahul-i Amethi dak alia Wayanad menden nungia tokteptsü

New Delhi, March 31 (Agencies): Taruba Lok Sabha election nung Congress Tir, Rahul Gandhi-i Uttar Pradesh nung Amethi constituency dak alia Kerala nung Wayanad constituency nungia tokteptsü, ta tanü party-i metetdaktsü.
Osangbenertem den jembidang Congress media cell tongti, Randeep Surjewala-i, “Rahul-i Wayanad menden nungi tokteptsü telemtetba agiba ya India south tsütsü alirtem dang parnok züngshir aser akhümtsübur ta sayuba temaitsü lir. Congress atema parnok sobaliba, oshiopen aser libaliroji tongtibang, aser India linük nung telemsa adokdaktsürtem anema raraba ka lir,” ta metetdaktsü.
BJP pur, talisa Amethi menden nung BJP candidate Union Minister Smriti Irani-i, Congress-i Tir (Rahul) atema menden tajung ka bushir, kechiyong par kibong (Gandhi) toktepa aruba menden nungi pai tamakok angutsüji tejangja, ta aija liasü.
Irani-isa, Kerala, Tamil Nadu aser Karnataka state tem nung Congress lenirtemi Rahul dang par state nung tokteptsü atema akhanger, ta sangdongbaji yazü, ta ashi.
2014 küm Lok Sabha election nung Amethi menden nungi Irani-i Rahul den toktep aser tera agi dang takok mangu.
Congress osang ajanga ashiba agi, Rahul-i Amethi aser Wayanad menden naprongla nungi takok ngura Rahul-i Amethi mendensa shimtsü.
Tanü taoba mapang Kerala chief minister, AK Antony-i, Rahul-i Wayanad menden nungi tokteptsü, ta sangdonga liasü.
“Wayanad ya Kerala, Tamil Nadu aser Karnataka ajurutepdak lir. Iba district ya Kerala nung lir aser külen Tamil Nadu kübok Theni aser Karnataka kübok Chamarajnagar district aser Mysore region den arrtsüa lir,” ta Anthony-i metetdaktsü.
“South tsütsü aliba state tem nung Congress jenjang junga lir, aser Rahul-i Wayanad nungi toktepba ajanga party aser teloktepi takok angutsü jenjang tajungba akümtsü,” ta party osang ka ajanga metetdaktsü.
Wayanad menden ya 2009 küm Mallapuram, Kozhikode aser Wayanad districts nungi tentet aser tesüiba election ana nung Congress lenir, MI Shanawas-i iba menden nung takok ngua liasü.