Tirap nung NPP pusemer ka tepsetba aitsür: NPP Nagaland

Kohima, Metsüremi/March 31 (TYO): March 29, 2019 nü Arunachal Pradesh kübok Tirap district nung telungpur südi ta mulung malemba nisungtemi NPP pusemer ka tepsetba aser zübo keta yirutsüba osang angashia National People’s Party, Nagaland Unit aoksar, ta tanü General Secretary – IPR NPP, Nagaland, Ricky Ozukum-i sangdong ka nung metetdaktsü.
“Party nung inyaker ana- Jaley Anna aser Kham Nai Abhi na puer oa teka sangshiba atema NPP, Nagaland unit-i sashia aitsür. Anna bo yiruba agi mekümzüki asü aser Abhi tang medical treatment tagidak lir. Tena ya Arunachal Pradesh nung Khonsa West assembly menden nungi toktepsang NPP candidate, Tirong Aboh pusemertem liasü,” ta NPP Nagaland sangdong nungsa shia lir.
“NPP, Nagaland Unit ya secular democratic yimtenren party ka lir, anungji item ama tatalokba ya sashia aitsür. India ama democratic linük ka nung langka ajangzüktsü mesüra yimtenren sangdong ka agütsütsü atema tashiyim amshibabaji tim masü. Item ama tatalokbaji nisung ajaki aser yimtenren party ajaki aitsütsüla,” ta sangdong nung shia lir.
Iba tatalokba atema NPP, Nagaland Unit-i mepelar aser asür Jaley Anna’er kibong züngsemtem den mangyim jashi lemsateper, iba denji külemi tang treatment agisang, Kham Nai Abhi tekaraba nung aneptsü sarasademtsür,” ta sangdong nung shia lir.
Party-isa Khonsa West assembly menden nungi party candidate, Tirong Aboh-i tasü aittsü aser party tangatetbatem nung ajemdaker inyaktsü ayongzüker, koba ajanga asür Anna-i taküm tenla agütsüba amajok masütsü saka nüburtem atema inyaktsü aser northeast tesem ajaklen terenlok bener arutsütsü atema NPP-i inyaktsü atema ajungmesotsü,” ta sangdong nungsa shia lir.