Angh-i Konyak aser Phom nunger den salem lemsatep

Dimapur, Rongchii/April 1 (TYO): Nagaland Angh, PB Acharya-i Konyak nunger Aoling aser Phom nunger Monyiu benjung amungba mapang salem lemsatepogo. Angh-i, iba benjung amungba ajanga alu nung tsük prokba tembangba sayur, aser mapa takok ngua inyakba sülen tsüngrem nungi temoatsü meshia, tsüngsangba, kentenba aser chia jemtepa tenüngsang agüja iba benjung amunger, ta ashi. Pai kin anaprongla dang, mapang agia tsüngrem nem pa temoatsü aser temeim asoshi tenüngsang agütsütsü ayongzük.
Angh Acharya-i aluyimertem tenüng asang, shirnoki asenok ajak asoshi kanga meranga inyaker.
Paisa, aluyimertemi mapa kanga meranga inyakba bilemtettsü asoshi ayongzük. Maneni pai, iba benjung ajanga sobaliba ajungkettsü aser wazüka ayutsü asoshi nüburtemi meranga inyaktsüla, ta ashi.
Aoling aser Phom Monyiu benjung amungba ajanga Naga nunger aser talisa Konyak aser Phom nunger nem yimjungyimjung aser telungjem bener arujang ta Angh-isa ashi.