Külem sabang

Tang ama election mapang nung, yimten, lokti tentet aser arogoi candidate-tem ajak külem sabang kati jaoker nübortem tsüngdang pei nükjidong aser tebilembatem shidakja jembidaktsüba sentong ya kanga junger. Iba ama sentong yagi election junga agitsüba nung dang masü saka election temer külena yimsüsürtemi nübortem tsüngdang nangzükba amato meyazüi inyaktsü merangtsü. Atangji, election ya bilemba aser merangdangba amato junga magitetter asünungji, election nung adokertemi akok tashi nübortem asoshi ochishia terenlok mapatem inyaktsünüaka meinyakteter. Iba jagi yimsüsürtemi nübortem aitsür aser nübortemi yimsüsürtem aitsür ta shitak inyakerbo kata mali, kati ka  aitsütepa küm pongngo süidaktsür. Tanü asen lima aser nübortem asoshi tetsükdaktsüji aji lir. Shidi süra, nübortema taaktsüka, election mapang kibong nung tsüraburi khen aser tanurtemi khen ta candidate dang sen meshia agir külenang, ano election temer külena sena meshir aser mapaa meshir ta shisaboludaktsür. Atangji, election nung toktepba nükjidongji candidate ka atema nübortem asoshi rongsen poktetdaktsütsü aser mapaa adokdaktsütsü asoshi lir. Ajisüaka, yimsüsür ka asoshi par nübortem nem kecha mapa meinyak ser angati sen agüja amongtsübaji tamakoktsü aser mapa teniyaktsü maka aser metemsü ser ita sen kija chia alitsü atema mapa agütsütsübaji tarutsü putu aser lanurtem ashioktsüba mapa ka asütsü. Item tebilemtsütem ajak ya asenok rongnung jembitepa metongshiteptsübaji election mapang külem sabang nung candidate-tem jaoka jembidaktsüba mapang ya shitak ka asütsü. Iba mapang nung candidate-temia pei mulung lapoka nübortem dang teshinütsü shitettsü aser nübortemia candidate-tem dang pei asüngdangnüba asüngdangtettsü. Iba nüngdakji reprangteta tang Aonglenden Assembly Constituency nung by election nung tokteper candidate-tem Dilong ward yimteni jaoka külem sabang nung jembidaktsübaji ajak asoshi tajangzük asütsüba sentong ka ayongzüka agiogo. Ano, parliamentary election nung toktepertem asoshia Nagaland Baptist Church Council-i tanü Kohima nung candidate-tem ajak jaoka agitsüba lir. Iba ama nübortemi candidate-tem külem sabangi jaoka jembidaktsüba aser sarasademtsüba jagi parnoka pei mapa nung tali tangatetba aser süoki taiba akümtsü. Atangji, taoba assembly election nunga tesem aika nung lokti aser arogoi candidate-tem külem sabangi jaoka jembidaktsüogo. Iba ama sentong nung shilem agia jembirtemi peii jembiba o tajungtem mamai mapa küma inyaktsü merangdar asütsü imlar. Iba ama külem sabang nung jembidaktsüba sentong ya ano maneni tesem ajaklen yimten, lokti tentet aser arogoi ayongzüka akatsüla. Ibai yimten aser alima yangluba sentong lir. Kasa election nung tokteper adokba yimsüsürtem rongnung asüyonga külem sabang nung shilem agirtem o magirtem na balala asütsü. Aiben asen lima nungbo election nung yimten  teloktem nükjidonga memetet election atemer. Ano aiben tesem aika nung candidate tejak mangudang aser olaa mangashidang election temadoker. Iba jagi election ajanga nübortem shimtetyonga nübortemia kecha balaka pei asoshi tajung inyakdaktsütsü atema yimsüsür shimer ta süoki ia mebilemer aser candidate-temia adokyonga-madokyonga pei ajangzüktsü asoshi masü nübortem asoshi inyaktsü ta asüba tangatetba aser temulungtetba melii dang election nung tokteper. Atangji, election mapang candidate ka asoshi kibong shia dangi aotsübaji tasak asütsü, anungji nübortem den jembitsü asoshi külem sabang ka yanglutsübaji election nung toktepertem asoshi maongka tulu lir. O ya kanga tongtibang, kechiyong o agidang nisung mulung akoktsü aser telemtetba agitsü aser iba telemtetba jagi mapa akümtsü. Iba tangatetba nung election nung toktepertemi nübortem den jembitsüla aser nübortem asoshia parnok o angadangtsübaji kanga tongtibang lir ta bilema külem sabang sentong ayongzüka akatsüla.