India-i Test Championship Mace küm asembuba agizükogo

Rongchii/April 1, 2019 (Agencies): India-i ICC Test Championship küm asembuba atonga kokogo. Iba Narokhüm den külemi senpet sen USD million 1 agizükogo.
April 1 nü tashi nung ICC Test Team ranking nung India team temaba jenjang nung tembang aser New Zealand tanabuba jenjang nung liasü, ta Hombarnü ICC sangdong ka ajanga metetdaktsü.
“ICC Test Championship Mace maneni agizükba atema onok kanga pelar. Format ajak nung onok team-i kanga junga asayaa arudar saka Test rankings nung temaba jenjang tongtetba ya talila tepala ka lir,” ta India captain Virat Kohli-i ashi.
“Test cricket koda tongtibang lir aji asenok ajaki meteta lir aser team tajungtibaiang iba jenjang tongteter ta jangjaa lir,” ta paisa ashi.
Temaba jenjang nungi India team asetshitsü imlaa mali asü aser kasa mapang nung New Zealand team jenjang ka tejakdangi atua tanabuba jenjang nung tembangogo.
NewZealand team captain Kane Williamson nem 2018 ICC Spirit of Cricket award agütsüogo aser par team-i point 108 nguteta senpet USD 500,000 agizükogo.
New Zealand captain Kane Williamson-i ashiba agi, ICC Test Team Rankings nung par team tanabuba jenjang nung tembangba ya jangratemtsüka lir. “Team ka ama iba takok ya onok asoshi nemadangtsü maparen ka lir. Iba jenjang ya asayar 11-i masü saka squad aser support staff ajaki kanga meranga inyakba ajanga ajangtetogo,” ta pai ashi.
South Africa team shirnok küm ana tashi tanabuba jenjang nung tembanga liasü, parnok tasembuba jenjang nung tembang aser parnok nem senpet USD 200,000 agütsü aser jenjang pezübuba nung tembangba team Australia nem senpet USD 100,000 agütsü.
ICC chief executive Manu Sawhney-i India team tenüng asangba den Test cricket koda tongtiba iba indang jembi aser World Test Championship nung shilem agitsü yongyaa ataba lemsatep. Iba asayamung ya May-July nung World Cup tembangba sülen tenzüktsü.
2021 küm World Test Championship Final nung shilem agitsü atema Test asaya balala linük teku tsüngda series 27 aser Test asaya 71 asayatsü.