Miami Final nung Federer-i Isner madak takok angu

Miami, Rongchii/April 1 (Agencies): Deobarbü ATP Miami Open tebur kija asaya Roger Federer-i 6-1, 6-4 agi defending champion John Isner madak takok nguogo.
Federer shiba, küm ana tashi clay court nung masayai aruogo, pai America nunger asayar madak minute 63buba nung takok ngua liasü, koba French Open nung asayatsü asoshi tamendakdak tajung ka asütsü.
“Ni clay court nung asayatsü atema tanem tanemi jenjang agitsüla. Ni küm ana tashi clay nung asaya aika nungbo shilem agia mali anungji ni kecha ajangshijar memetet, saka tang iba asayamung akokba ajanga pressure aginer,” ta Federer-i ashi.
“Ni mapang tatsüka anisüngzüker taruba asayamung atema renemshinüa bilemer. Ni junga asayatsü atema temang anema alitsü nüngdaker, saka mapang nem shidaktsüdi,” ta paisa ashi.
“Ni kanga yongyaa atar, iba ya challenge tajung ka asütsü,” ta Federer-i Roland Garros nung Rafael Nadal atsüngdoktsü indang jembidang ashi. Taküm asoshi tanabuba Grand Slam ya May 26 nü tenzüktsü.
Pa iba ita tetenzüklen Indian Wells final nung tamakok anugba sülen Miami Open nung kanga junga asayaa final nung Isner madak takok nguogo, shiba tetsüng nung timtem aliba ajanga kanga timtema asayaogo.
Federer Monte Carlo Masters event nung shilem magitsü saka May ita asayatsü aliba Madrid open nungbo asayatsü.
“Madrid nung asayatsü atema repranga atati. Ni Paris nung asayamung atema renema ataner aser grass aser hard court nung asayaba ajanga teyari agütsütsü imlaa atati,” ta pai ashi.
Final asaya tenzükli nungi Federer-i asaya amokbanger asya aser mezüngbuba game nung Isner indang serve break asüba nungi tenzüker asaya matem tashi pa tejakdang sür asaya.
Isner, tetsüng nung timtem aliba ajanga kanga timtema liasü aser medical timeout mapang pai pa indang trainer dang pa tetsüng raksatsü tsübua bilemer ta ashiba angashiogo.
“Mezüngbuba set nung kü tetsüng nung tashiba adok aser iba tashiba ya tamajungba küma ao,” ta Isner-i ashi.
“Asaya tezüdangtsüka liasü, kechiyong na atsükoktsü atema teammate shinga mali aser alima nung asayar tajungtiba ka den asayaba mapang kü tetsüng agi timtem kanga agütsü. Ni tetsüng kodanga raksadanga mali saka tetsüng raksangdang tashibaji yamai asütsü ta bilemogo.
“Ni asaya akoktsü ta ashir masü saka ni tajungba asayateter lila aser nüburtema jangrademdaktsütetla,” ta paisa ashi.