Manipur police constable ka police ket nung asü

Guwahati, April 1 (Agencies): Telungpur ka jena aoba atema tai tonglokja mapa nungi anenja aliba Manipur police constable ka police ket nung asü.
Iba nisungji Thoubal district kübok Yairipok Ningthoumanai nungi Manjur Ahmed liasü. Honibarnü interrogation cell ka nung pa sür lia angu, ta osang ajanga ashir.
Ahmed ya Imphal East police reserve line nung mapa lemzüka liasü aser pa asüba atema magisterial enquiry asütsü tetuyuba agütsüogo.
Imphal East nung district magistrate-i bushisüngdang asütsü, ta Manipur state home department-i metetdaktsü.
Kangleipak Communist Party (KCP)-Nando faction nung commander Thokchom Nando Singh (Nanao) police ket nungi jena aoba dak sendakba nung Ahmed mapa nungi anentsü.
Nando ji Jawaharlal Nehru Institute of Medical Sciences (JNIMS) indang hospital security ward nungi jena ao.
Taoba minister Francis Ngajokpa’er jala Lungnila Elizabeth (8) pur tepsetba dena ozüng alema inyakba ken o aika nung Nando dak tai tonglokja apu.
November 4, 2003 nü Little Flower School, Imphal nung Elizabeth ya mejangjatetba nisung kari pur ao. Iba sülen November 12, 2003 nü la indang mangji Sadokpam yimtsüng nung angu.
Elizabeth ji sen lakh 15 yong pur ao ta osang ajanga ashir. Iba tatalokba anema lungkak aitba sülen Central Bureau of Investigation (CBI) nem bushisüngdang südaktsütsü atema agütsü.
Manipur Chief Minister N Biren Singh-ia police constable asüba atema tai apurtem merenshitsü ta metetdaktsü.
“Iba mapa nung shilem agir shinga metoktsütsü. Parnok dak ozüng tesashi agi merenshitsü” ta Singh-i ashi.