NE nunger akhümtsübua Rajya Sabha nung CAB mebenok: Rijiju

Itanagar, April 1 (Agencies): Centre-i Northeast nunger taginüba akhümtsübua Rajya Sabha nung Citizenship (Amendment) Bill, 2016 mebenok, ta Union Minister Kiren Rijiju-i ashi.
“Northeast nung alirtemi Bill junga meshisadangi anema noktak. State aika posema nungitaka sorkari nübortem akhümtsübua iba Bill Rajya Sabha nung mebenok” ta pai ashi.
CAB ajanga Arunachal Pradesh nung alirtem mekongshitsü kechiyong Bengal Eastern Frontier Regulation Act kübok ozüng balala ajanga ketdang asür. Tanga state tem nungi arurtemi Inner Line Permit bener ang Arunachal Pradesh-i arur aser foreigner temia Protected Area Permit (PAP) aser Restricted Area Permit (RAP) meshir ang semdangtsü akok, ta Rijiju-isa shisem.
Citizenship Act, 1955 yanglushitsü atema Citizenship Bill ya 2016 küm Lok Sabha nung benok. Iba bill yagi Citizenship Act, 1955 yanglushir Afghanistan, Bangladesh aser Pakistan nungi aruba Hindus, Sikhs, Buddhists, Jains, Parsis aser Christians nem senso agütsünür.
Lok Sabha nung CAB benoka agizükba sülen Northeast ajungalen nübortemi lungkak ait.
Bharatiya Janata Party (BJP) lennir aser Assam Finance Minister Himanta Biswa Sarma-i ashiba agi, iba Bill metongshitsü atema Asom Gana Parishad (AGP) den olemtep tenzükogo.