Manipur party 4-i Congress yaritsü

Imphal, Rongchii/April 2 (Agencies): Mongolbarnü Manipur nung political party pezü-i taruba Lok Sabha election nung Congress candidate ana yaritsü telemtetba agiba sangdongogo. Parnoki ashiba agi, democracy aser India kümzüka ayutsü mechi nung parnoki Congress yaritsü asoshi telemtetba agiogo.
Item party tem yagi secular democratic front ka tenteta lir aser Congress yaritsü asoshi telemtetba agiba party tem rongnung Janata Dal-Secular (JD-S), the Trinamool Congress Manipur, the Democratic Janata Party Manipur aser Manipur Samajwadi Party densema lir.
JDS-S tir Manihar Goswami-i ashiba agi, “onoki state nung ken o balala dak sendakba nung olemtepogo aser Congress amala party kati ang democracy aser India kümzüka yutettsü ta asatetogo. Ibayongji onoki taruba election nung Congress nem teyari agütsütsü asoshi telemtetba agiogo.”
Iba osang ya Manipur state Congress unit tekolakba Gaikhangam aser Manipur Chief Minister term asem tashi bener alisang Okram Ibobi aser party tem nungi lenirtem matsüngda Congress office nung sangdonga liasü.