Silchar nüboyimba sentong nung Modi adentsü

Guwahati, Rongchii/April 2 (Agencies): Ato Kilonser Narendra Modi shibai tawa Assam semdanga Dibrugarh district kübok Moran aser Biswanath district kübok Gohpur tesem nung par party candidate atema nüboyimtsüogo, pa tanaben April 7 nü Assam-i nüboyimba sentong ka nung adeni arutsü.
Ato Kilonser-i party candidate tem atema Barak Valley kübok Silchar tesem nung nüboyimba sentong nung shilem agitsü.
Modi-i Assam tanaben semdangtsüba osang ya Bharatiya Janata Party (BJP) general secretary aser northeast in-charge Ram Madhav-i sangdong ka ajanga metetdaktsü.
Hombarnü Guwahati Lok Sabha candidate Queen Ojah nomination file asüba sülen Guwahati nung osangbenertem den sensaksemba mapang Ram Madhav-i, maneni Assam nung par party-i menden 10 akoktsü ta shia liasü. Assam nung Lok Sabha menden 14 lir.
BJP pur parliamentary constituency 10 nungi tokteptsü aser parnok den longjemer aliba Asom Gana Parishad (AGP) pur menden asem nungi aser Bodoland People’s Front (BPF) pur menden ka nungi toktsptsü.
AGP pur Kaliabor, Barpeta aser Dhubri parliamentary constituency nungi tokteptsü aser BPF pur Kokrajhar Lok Sabha constituency nungi tokteptsü.
Silchar Lok Sabha constituency nung BJP puri party state otongdar Rajdeep Roy yoktsü, shiba Indian National Congress’ MP aser All India Mahila Congress tir Sushmita Dev den tokteptsü.
Kasa mapang nung Karimganj Lok Sabha constituency nungi Kripa Nath Malla tokteptsü shiba Ratabari Assembly constituency nungi MLA lir.
Malla ya 2011 küm Ratabari Assembly constituency nungi Congress ticket amer adok saka BJP nung aden aser tanaben shimshi.
Maneni April 7 nü Modi Tripura nunga party candidate asoshi nüboyimtsüba sentong nung adentsü.