Cong-i election nungang sensakertem atema jembir: PM Modi

New Delhi, April 2 (Agencies): Congress party-i sensakertem atema minimum guarantee scheme NYAY nangzükba aija tanü Ato kilonser, Narendra Modi-i, Congress-i election mapang nungang sensakertem bilemteter, ta ashi.
Tawa Congress-i NYAY (Nyuntam Aay Yojana) scheme sangdonga liasü, iba scheme kübok sorkari sensakertem nem ita shia sen 6,000 agütsütsü.
Tanü Odisha kübok Kalahandi nung election nüboyim sentong ka nung jembidang Modi-i, “Parnoki election mapang nungang sensakertem tetshir, ajisüaka parnoki sensakertem temeden rakzüker. Ibaji Congress mapatong aser tangatetbatem lir,” ta ashi.
“Yangi Kalahandi nung Rajiv Gandhi (taoba mapang Ato kilonser)-i, pai Delhi nungi sen 1 yokra poisa 15 agi dang sensakertem ket atonger ta jembia liasü. Küm aika sülen Congress-i Delhi nung sorkar akumba mapang nung parnoki, sen 1 nungi poisa 16 dang angur ta ashi. Anungji küm 25 nung Congress-i Odisha nem poisa 1 teyari dang yok. Nenoki item nisungtem dak amanger asü,” ta pai asüngdang.
Modi-isa, par sorkaribo sensakertem nem poisa 100 yokra ajak jagi sensakertem ket atongtsü atema inyaker, ta ashi.
“Congress-i küm aika nung meinyaktetba onokibo küm pongu nung inyaktetogo. Tom nung inyakertemi sen kwi angu aser kwi black money akumerar meteter ma? Sensakertem tebilemtsü atema parnoki meinyak. BJP sorkaribo sensaker indang sen tom nung samaba anendaktsü,” ta pai ashi.
Paisa Odisha nung ruling party Biju Janata Dal (BJD)-a aija, state nüburtem atema BJD-i kecha meinyak, ta ashi. BJD tongti aser Odisha Chief Minister Naveen Patnaik-i Congress sülen anidaka ochimashi benshir, ta Modi-i aitsü.
Odisha nung Lok Sabha menden 21 aser Assembly menden 147 atema April 11, 18, 23 aser 29 anogotem nung election agitsü. Kalahandi nunga April 11 nü election agitsü aser May 23 nü vote azüngtsü.