NDPP 5 Ghaspani-II A/C nüboyimba sentong tenzükogo

Dimapur, Rongchii/April 2 (TYO): March 29 nü NDPP 5 Ghaspani-II A/C kübok yimtsüng unit nungi tirtem, Parent, Women, Youth, Minority, Agri aser Allied Wing executive A/C official temi taruba Lok Sabha election atema NDPP candidate Tokheho Yepthomi asoshi nüboyimba sentong tenzükogo. Iba sentong nung constituency MLA Zhaleo Rio, IAS (Retd.), Speaker in-charge, NLA dena liasü.
Nüboyimba sentong nung jembidang Zhaleo Rio-i, PDA sorkari ajangtetba party ketdangsertem nem metetdaktsü aser tarutsü nükjidongtem indang lemsatep. Paisa, “yimden yimsüsüba nunga tenangzükba aser bendanga agüja inyakba ya mapa ajanga sayur aser PDA sorkari grass root level nungi tenzüka lenla ajak nung renloka aotsü asoshi takokba tashi inyaktsü,” ta ashi.
MP election nung PDA candidate asütsü asoshi shimba Tokheho indang jembidang, pai Tokheho dak lenir ka asütsü asoshi nüngdakba yimya aser sempet ajak keta lir aser pa temsüa aliba dang masü saka candidate rongnung tajangshiba timba bener aliba lenir ka lir, ta ashi. Paisa party nung inyakertem dang social media balala ajanga olulu osang prokshiba agizüktsü kümküma alitsü ajungshiba den item osang ajak liaka voter temia telemtetba agitsü ta ashi.
Lentirtem rongnung NDPP Dimapur & Peren District Incharge Charlie Sekhose-i, party nung züngsemtem ajaki lenla ajak nung bendanga agüja inyakba asoshi tenüngsang agütsüba den parnok ajak dang election nung takok angutsü atema maneni bendanga agüja inyaktsü ayongzük. Paisa party nung inyakertem ya nüburtem ajungtsü asoshi bendanga inyakertem lir, ta ashi.
Iba sentong ya Sovima nung agi, koba party lenir tejen Miathou Krose kübok aka aser NDPP 5 Ghaspani-II A/C, tir Dosau Kuotsu-i tir o jembia liasü.
Kasa mapang nung NDPP 5 Ghaspani-II A/C tir Dosau Kuotsu aser General Secretary Tokihe Zhimomi nati, par constituency-i, Eastern Nagaland nungi MLA 7 densema party züngsem tasentem dang pelaba lemsatep, shirnoki taruba Lok Sabha election nung PDA candidate yaritsü asoshi nangzükogo. Kasa sangdong nungsa CM, Neiphiu Rio lenisüba kübok PDA candidate yaritsü asoshi shirnoksa onok den denogo, nenok ajak dang pelar, ta metetdaktsü.