Tuensang nung ICU lapoktsüogo

Tuensang, Rongchii/April 02 (TYO): Tuensang district nung temulunger, Assam Rifles aser Tuensang Chambers of Commerce & Industries (TCCI) na longjema yangluba Intensive Care Unit (ICU), April 02, 2019 Mongulbarnü lapokja liasü, ta sangdong ka ajanga metetdaktsü.
Iba project ya Assam Rifles-i ICU atema nüngdakba kol osettsüset agi nungita liasü. Kasa mapang TCCI-i senotsü den kisü-jensüba osettem agüja aser temulunger tenla tem bendena iba ICU renemogo.
ICU lapokba sentong nung IG AR, Maj Gen P.C. Nair YSM tongti tesemdanger liasü aser sentong nung pai jembiba mapang ICU Project tenzükba indang telok dang rasa ashi.
Tuensang nübur atema nüngdakba ICU ya nübur ajak longjema nüngitba project ka lir koba Tuensang nung alir kija shia pei akok yari tenlaba kuli, iba project ajanga sayur, ta Nair-i ashi.
Iba project ya ita pezü nung renem, ta Nair-isa ashi.
Kasa sentong nung Principal Director Health & Family Welfare, Dr. Vikeyie Losu-i, iba project nung stake holders temi kanga bendanga agüja meranga inyakogo aser Nagaland nung tanüngba district tem nunga amenoktsü imlar, ta ashi.
Iba department (ICU) nung nüngdakba inyakyimtem, nübo süshia aser ICU amshiba yimyatem atema Kohima nungi teyari agütsütsü, ta Dr. Vikeyie-i ashi.
Iba project asangsang nung mapa küma inyaktsüba atema AR, TCCI aser temulunger tem dang peleba metetdaktsü.
District Hospital Tuensang nung doctors aser nurses tem aruagi tenzüktsü atema tajungshiba den tayongzükba ama asütsü, ta Medical Superintendent Tuensang, Dr. Moa Jamir-i ashi.
Sentong tenzüka TCCI, President Dorothy Chang-i telok pela agizük. Kasa mapang Assam Rifles tenüng nungi Brig S K Sheoram, SM-i jembi aser President CCSU, Chingmak sentong lennir liasü.