PM election atema PDA pur Mkg dist nung campaign tenzükogo

Nagaland Chief Minister, Neiphiu Rio den PDA candidate Tokheho Yepthomi aser sentong nung tongti shilem agirtem. Mokokchung, April 2, 2019 

Changtongya Town, April 2 (TYO): Tang aruya aliba Parliamentary Election 2019 nung People’s Democratic Alliance (PDA) consensus candidate, Tokheho Yepthomi atema Mokokchung district nung campaign tenzükba sentong tulu ka Changtongya town public ground nung ayonga agiogo.
Tanü iba sentong nung PDA-i shimba candidate, Tokheho Yepthomi atema nüboyimtsütsü Nagaland Chief Minister, Neiphiu Rio-i anir par külem cabinet yimsüsürtem, adviser, PDA telungjem nung aliba party balala nungi lenirtem aika arua shilem agia denogo.
Nagaland CM N. Rio-i jembidang, PDA candidate Tokheho-i akoktsü makoktsü indang mejembir, kechiyong takokji angutsübasa saka vote aikati akoktsü atema inyaker, ta ashi.
Opposition telok NPF purji joko loksar raratep manener, “26 MLA aliba party kati candidate meshimteti MLA kata maliba Congress candidate ka asemba tetezü parnok dak mangdang maliba den lenisütsü sempet maliba sayur”, ta Rio-isa ashi.
NPF-i social media balala nung tiyazü osang kanga proker, parnoki yamaji tiyazü jembiba ajanga nüburtemi joko parnok dak temulung melemer. Aji asünung, NDA sorkaria parnok dak temulung malemba agi yaküm state election nungto NDPP den ang pre-poll alliance yanglu, ta paisa kuli kar dena ashi. “Taoba mapangbo NDA-i NPF den alliance partner süa aru, saka parnok den alliance raksabaji tetezü tulu lir”, ta paisa shisem.
“Taoba kümsük nungto oppositio maliba sorkar yanglur MLA 60 prongla NPF den liasü, saka nüburtemi parnok dak temulung melemtetbayong kü lenisüba nungang sorkar yanglutsü tashi agütsü”, ta paisa ashi.
Aikati BJP ya communal aser Hindu party ta jembir, saka Congress den aliba yimden telok (alliance partner)-tem dang nungi NDA nung alliance partner-temji teimba lir, anungji, iba jagi Congress dang nungibo BJP ang secular party tasüba sayur, ta pai jangjashitsü. Taruba central sorkarjia BJP-i aniba NDA sa arutsü, kechiaser state teimbaka nung BJP-i aniba sorkar lir, ta pai kuli kar dena ashi.
Paisa “Citizenship Amendment Bill” indang jangjashidang, Naga nungerbo CAB nungi kümzüktsü lenmang aika lir, aji saka, iba dak sentakba nung shisa agitepa nübur nungi ola angadangtsü atema 31st Jan 2019 nü kin ajak nungi hoho-tem, telok tongtibangtem aser yimden telok ajak nungi lennirtem jatep, saka NPF bo iba senden nungji maden, ta pai ashi.
Opposition-i CAB-ji asenok atema majunga ta ashir süra sendeni arua tanga teinyaktsü lenmang (alternative) kar tuyutsü tim saka parnoki yamaji kecha meinyak. “Iba tetezü parnok dak Naga nunger ajungtsü atema mangdang maliba sayur,” ta paisa aitsü. Iba senden nungji ILP-ji Dimapur densema district ajak nung alitsüla ta renema ibaji mapa küma inyakdar, ta paisa shisem.
Naga yimden tebilemtsü dak sentakba indang olen kar ashidang, BJP-i aniba NDA sorkar ya kanga takang aser tashi tait sorkar ka asünung, parnok mapang nung dang Naga yimden tebilemtsü yaa teti asoshi telatetba bener arutsütettsü. NDA sorkari dang Naga nungerji tangar dang nungi shilu balaka ta agizük aser par mapang nung dang “Framework Agreement” jia sign asü, ta paisa metetdaktsü.
Tokheho-ia mapang tatsüka agia jembidang, Rio-i azüngtettsüba MP kibasü menden nung PDA temoatsü ajanga mapang tatsüka inyaker ano tanaben maongka agüja PDA consensus candidate shimba asoshi pelaba lemsatep.
Rio-i MP tatsüka abendang pai Naga nunger yimden tebilemtsü atema temulung kanga agüja inyak. Iyongji tanüa iba nungji ajemdaker Naga yimden tebilemtsü maparenji tejakleni bener odar aser ibai takaratiba nung tatembang kati arutsü asoshi maneni temulung agütsütsü, ta pai ashi.