BJP-i Northeast nung sen tashi amshir: Congress

Itanagar, April 3 (Agencies): Arunachal Pradesh nung BJP-i sen yong vote alizüktsü meranger ta Congress-i tai tongloktsür.
Chief Minister Pema Khandu’er convoy nungi sen crore 1.8 apuba sülen Congress-i Election Commission dang Prime Minister Narendra Modi, chief minister Pema aser deputy chief minister Chowna Mein nungertem anema ken o ka benokang ta takhangba agütsür.
Northeast India nung BJP-i vote agütsürtem mesütsü atema sen tashi amshir, ta Congress chief spokesperson Randeep Surjewala-i ashi.
“Bodbarnep Pasighat nung Modi-i nüboyimba sentong ka nung adentsü lia yasüng ayaterm nung chief minister’er convoy nung sen crore 1.8 bena aliba apu” ta paisa ashi.
Khandu aser deputy CM Chowna Mein na tangsa mapa nungi anentsütsüla. Talisa Arunachal West Lok Sabha constituency nungi tokteptsü aliba Arunachal Pradesh BJP president Tapir Gao indang candidature agientsüla, ta Surjewala-isa ashi.
Election Commission, local administration aser police lia sen apuba indang video ana Surjewala-isa sayu.
Youth Congress züngsemtemi Pasighat nung ketdangsertem dang ashiba sülen senji apu, ta paisa ashi.
“Tamakok angutsü ta metetba agi BJP-i northeast nung sen tashi amshitsü meranger” ta Surjewala-isa aitsü.
“Kechiba Election Commission-i ola madoker aser iba asoshi ken o mebenoker. Kechiba iba tatalokba miimbangtsü meranger?” ta paisa asüngdang.
Senji Election Commission indang Expenditure Officer Samrita Kaur Gill lia apu aser Pasighat Deputy Commissioner Kinny Singh-ia o jembiba video nung menüngoka lir.
“Sen crore 1.8 ji tanü Pasighat nung PM Modi’er rally nung amshitsü atema CM’er convoy aser BJP president-i kümzüka bener aoba asü? Sen paikaji kong nungi aru?” ta Surjewala-isa asüngdang.
“BJP-i iba tatalokba miimbangtsü meranger. Prime minister-ia sen paikaji belenba meteta liasü asü koda ta onoki asüngdanger. Meteta liasü süra People’s Representation Act, 1951 kübok PM Narendra Modi, Arunachal CM Prema Khandu aser Arunachal Pradesh BJP President Tapir Gao nungertem anema FIR ka benoktsüla” ta Congress spokesperson-isa ashi.