Cong manifesto ya nüburtem mezüngmeshiba ka lir: Amit Shah

New Delhi, April 03 (Agencies): Yashi Congress party-i Lok Sabha election atema party manifesto sayaba sülen ibaji aija tanü BJP Tir, Amit Shah-i, Congress pur election manifesto ya yazü bendenbatem lir, aser iba ya linük nüburtem aser sepaitem mezüngmeshiba lir, ta ashi.
Opposition party Congress-i Arrla 124A (sedition law) agientsü aser Armed Forces (Special Powers) Act reprangshitsü nangzükba aija Shah-i, iba ya ajanga kiralongrartem aser separatists peladaktsütsü saka sepaitem melungbo ajema kümdaktsütsü, ta ashi.
Sedition ozüng agienba ajanga linük anemertemi India anema jembitsü aser AFSPA agienba ajanga kiralongrartem anema amshiba sepaitem hadir rakzüktsü, ta pai ashi.
Congress-i NYAY scheme (Minimum Income Support Programme) ajanga linük nüburtem ashioktsür, ta pai ashi.
Yashi Congress-i sangdongba manifesto nung linük nung kanga sensakertem kibong shilem 20 nem NYAY (Nyuntam Aay Yojana) agütsütsü nangzük. Iba scheme kübok parnok nem küm shia sen 72,000 agütsütsü aser 2030 küm tashi nungbo linük nung sensak tia samatsütsü, ta nangzük.
NYAY scheme ya yazü, aser iba scheme ajanga Congress-i votes angutsü meranger, ta Shah-i ashi.
Congress party-i yazü jembiba ya tang mezüng masü saka akhidang nungi yazü jembia arur, tanü tashi nung parnoki nangzükba ka danga meinyak, ta paisa ashi.
Jammu & Kashmir nung taoba Chief Minister, Omar Abdullah-i state nung Tir aser Ato kilonser temeja akhangba dak sendakba nung Shah-i, “Linük ka nung komaser Ato kilonser ana alitsü? Congress-i langzütettsü ama? Jammu & Kashmir ya India shilem ka masü no?” ta asüngdang.