PM Modi-i teti tiyazü jembir: Rahul Gandhi

Bodbarnü Congress president Rahul Gandhi-i Golaghat district kübok Bokakhat high school ground  nung nüboyimba sentong ka nung o jembidang agiba noksa angur. 

North Lakhimpur/Golaghat, April 3 (Agencies): Tanü Congress president Rahul Gandhi-i North Lakhimpur nung nüboyimba sentong ka nung jembidang Prime Minister Narendra Modi-i tiyazü tenangzükba agibatem bilemtetdaktsü.
Linük nung senso shia nem sen lakh 15 agütsütsü ta Modi-i jembiba pai nenshi.
14 Lakhimpur HPC nungi Congress candidate atema nüboyimba sentong ka nung Rahul-i corporate nisungtem yariba atema aitsü.
Rafael tenangzüktep nung Anil Ambani nem public sen Rs 30,000 lakh tashi tajangzük ngudaktsüba atema Rahul-i Modi aitsü.
Centre nung Congress-i sorkar kümra Nyuntam Aay Yojana (NYAY) scheme kübok sensaker kibong million 50 nem ita shia Rs 6,000 minimum income guarantee agütsütsü ta paisa nangzük.
Nyay scheme ajanga küm shia sensaktiba kibong 20% nem Rs 72,000 agütsütsü alizüng lir. Anil Ambani ama nisungtemi public sen auyazükba meyipa bener arutsü, ta paisa ashi.
Modi’er sorkari Northeastern state tem nungi agienba special status category meyipa bener arutsü aser Planning Commission tentetshitsü, ta Rahul-isa nangzük.
Congress-i Parliament nung Citizen (Amendment) Bill magizükdaktsütsü aser Assam ya RSS ideology ajanga raksatsütsü meranger, ta paisa aitsü.
14 Lakhimpur HPC nung Congress candidate Anil Borgohain nem vote agütsütsü atema paisa mepishi.
Tanü Bokakhat aser Nagaland nung nüboyimba sentong balala nung adenba sülen Rahul Gandhi helicopter ajanga North Lakhimpur-i aru.
Iba mapang Assam Pradesh Congress Committee Ripun Borah aser Lakhimpur District Congress President Joy Prakash Das nati pa mein.
Tanü Rahul-isa Golaghat nung kasa nüboyimba sentong ka nung jembidang GST melenshitsü indang tenangzükba ka agi.
“Linük nung lanurtemi business tila tenzüknür saka Modi’er India nung asenoki temelaba meshitsüla aser süpokrem agütsütsüsa akümer. Ajisüaka, Congress sorkar kümra, nenoki business tila tenzüknüra mezüng küm asem atema atema temelaba menüngdaktsü” ta paisa ashi.
“Chowkidar (PM Narendra Modi)-i teti tiyazü jembir. Ajisüaka onoki kechi jembidir yamaji inyaker. Onoki tea estates nem minimum wages agütsütsü nangzük aser ibaji inyaktsütsü. Iba ya ideology tsüngda rara ka lir. RSS, BJP-i linük raksatsütsü meranger saka Congress-ibo longjemdaktsür. RSS aser Nagpur-i Assam, nür putiotsü, tangatetba aser sobaliba raksatsütsü meranger” ta Rahul-isa shisem.
Tanü Golaghat nung Rahul-i Kaliabor constituency Congress candidate Gaurav Gogoi atema nüboyimtsü.