‘O masü Mapa’ tangatetba nung noktaka lir: Dr. Nicky Kire

Kohima, April 3 (TYO): Nagaland nung NDPP-i aniba PDA sorkari “O masü Mapa” omen nung akangakanga noktaka lir ta tanü Rural Development indang Advisor, MLA Dr Neikiesalie Nicky Kire-i ashi.
9-Kohima Town Assembly Constituency atema Lok Sabha election campaign tembangba sentong ka taonung New Ministers’ Hill Panchayat Hall nung agidang Dr. Nicky Kire-i nübortem dang opposition Naga Peoples’ Front aser tanga political party temi olulutem prokshiba nung mamangtsü ayongzük.
NDPP-i aniba PDA sorkar tashi itta lir aser omen o “Temelenshi Arudar’ yimyim ama inyaksangshia aotsü, ta paisa ashi.
“Taruba Lok Sabha elections ya nübortemi ruling mesüra opposition nung alitsü jangraba indang asütsü. PDA consensus candidate Tokheho shimba ajanga State sorkar aser Lok Sabha MP tsüngda amalitep tajung aliba ajanga terenlok bener arutsü,” ta Advisor Kire-isa shisem.
NDPP joko loksaa taoer aser Election Commission-i derecognize asütsü ta NPF-i jembiba olulu ajak tiyazü liasü ta kuli sayuogo. Anungji parnoki tiyazü jembiba nung mamangtsüla. NDPP nominee Tokheho-i LS election nung takok angutsü, ta paisa metetdaktsü.
Iba sentong nung NDPP Kohima Region president Zhotuo Kire aser JD(U) Nagaland lennir T Semy natia o jembidang NDPP candidate Tohekho Yepthomi nem vote agütsütsü mepishi.