Meluri nung PDA pur election nüboyimba sentog agi

Meluri  nung April 2 nü Planning & coordination &land revenue Minister Neiba Kronu-i PDA party nüboyimba sentong nung o jembidang tangokba noksa nung angur. 

Dimapur, Rongchii/April 3 (TYO): Mongolbarnü Meluri nung PDA pur election atema nüboyimba sentong nung jembidang planning & coordination and land revenue minister Neiba Kronu-i ashiba agi, NPF pur policy tai benshiba aser parnok yongtsü nung mangatettep aliba ajanga nükjidong sama odar. NPF pur yimden yimsüsüba tsütsü tebilemdangba ka mali aser taruba Lok Sabha election nung nüburtem matsüngda koda nokdakjar memetet, kechyiong parnoki candidate ka dang iba election nung tokteptsü asoshi meyok aser Congress yaritsü asoshi telemtetba agiogo, ta paisa ashi.
Nüboyimba sentong nung sentepa aliba lokti den jembidang, minister-i nüburtem dang olulu aser propaganda balala adokaba dak mamangi pei vote kanga shisakaa NDPP candidate Tokheho Yepthomi nem agütsütsü asoshi ayongzük.
Paisa party nung inyakertem dang Tokheho-i iba election ayong ayonga akoktsü atema meranga inyaktsü mepeshi. Nüburtem manisatsüla, ta Kronu-i ashiba den NDPP pur anogo ka nung anogo ka ta tashi taitba aser tajungba küma odar aser parnok policy aser tebilemdangba süngjang grassroot tonga odaki. Iba dak sendakba nung pai nüburtem dang lenla ajak nung renloka aotsü asoshi PDA sorkar den sendaktepa alitsü ayongzük.
NDPP General Secretary Neikhrolo Khalo, JD (U) Nagaland organising Secretary H. Mukam, NDPP women wing vice president Abeu Mero, NDPP ex candidate Nyusietho, ex MLAs Chiekhwutso aser Khuosatho nungeria iba sentong nung o tatsütsü jembia liasü.
Iba sentong tembangba sülen Minister den külemi election committee ketdangsertemi Razeba aser Pfutsero nung nüboyimba sentong nung shilem agia liasü. Nüboyimba sentong nung o jembirtem rongnung Neiba Kronu, Er. Vekho Swuro, Kevechutso Doulo, Nuzota Swuro aser Mosonyi Domeh nunger densema liasü, ta ketdangser sangdong ka ajanga metetdaktsü.