Mopungchuket nung TB awarness sentong katsüogo

Mokokchung, Rongchii/April 04 (TYO): Mokokchung district kübok Mopungchuket yimtsüng nung April 03, 2019 Bodbarnü Indian Council of Medical Research (ICMR), Regional Medical Research Centre (RMRC), Dibrugarh-i “It’s time to end TB” ta nüngja agütsüba omen nung ajemdaker TB awareness sentong ka ayongzüka agia liasü.
Iba sentong nung District TB Officer, Dr. M. Imyangluba Ao tetushi tesemdanger ama arugi denogo.
Sentong nung jembiba mapang Imyangluba-i, TB dak sendakba nung tongtibang onüktem, iba tashidak temaitsü aser TB tashidak agi shiranger aser parnok anepalurtem nem sorkari facility balala agütsüba indang lemsatepa liasü.
Tensa mapang balala nung nübur aikati mashishi toktsüba tashidak tali jangjaa metettsüsa iba ama sentong ayongzükba atema, pai ICMR dang pelana metetdaktsü.
Iba sentong nung yimtsüng nungi yimsüsürtem, NGOs aser nüburtem aruagi dena liasü. Sentong nung village council chairman Aosadang-i telok pela agizük aser iba denji külemi, ICMR team-i iba ama survey aser taoba küm nungi tenzüka inyaka aruba maparen den atonga agisemba sentong atema Mopungchuket model village ama shimba asoshi pelaba metetdaktsü.
Kasa sentong nung TB dak sendakba nung kentem aser jilushi balala sayaa liasü.