V-Guard-i Naga Hospital nem ambulance tenla agütsü

Kohima, Rongchii/April 4: Kohima nung Bodhbarnü naga Hospita kima V-Guard Branch in-charge (NE States), Nilotpal Bhattacharjee-i, NHAK Managing Director Dr. Thorhusie Katiry nem ambulance (bolero) indang jabi agütsüba noksa nung angur.

Dimapur, Rongchii/April 4 (TYO): V-Guard Industries Limited-i Mongolbarnü Naga Hospital Authority Kohima (NHAK) nem 40buba anniversary amungba nüngtem nung ambulance ka tenla agütsüogo.
V-Guard ya Kochi, Kerala nung amnedaker lir aser parnok ya electrical appliances, multi-product company ka lir. Branch in-charge (NE States) V-Guard, Nilotpal Bhattacharjee-i, NHAK Managing Director Dr. Thorhusie Katiry nem ambulance (bolero) ya officially agütsü.
Iba sentong nung o tatsüka jembidang Bhattacharjee-i, par company 40buba anniversary nüngtem nung India kübok tesem balala nung non-profit organizations aser hospitals tem nem, nüngdaka aliba shirangertem nem jungdak mapang teyari agütsütsü asoshi ambulances 40 tenla agütsüogo, ta ashi.
Dr. Katiry-i, V-Guard puri tekübokba jenjang nung aliba nüburtem nem teyari agütsütsü atema NHAK nem ambulance ka tenla agütsüba atema V-Guard pur dang pelaba metetdaktsü.
Iba mapa tajung pelashishia agizükba den iba ya jenjang tuluka ta shia pai iba ambulance ajanga medical services kara kara nüngdakba shiranger aikanem tejangzük agütsütsü imlaba lemsatep. “Onoki iba ya kanga shisakaa amshitsü,” ta Dr. Katiry-i ashi.
Lokit nung tekübokba jenjang nung aliba nüburtem health tsütsü tenüngdakba tem temulung dang yur V-Guard-i tashidak balala dak sendakba nung tangazükba balala agütsüba den primary healthcare tem nung temang anepalutsü asoshi maongka agütsür aser taküm kümzüktsü asoshi mozütem ngutettsü asoshi temelaba kümdaktsür.
V-Guard-isa, Voltage Stabilizer nungi Digital UPS, Inverter aser Inverter Batteries, Electric Water Heaters, Solar Water Heaters, Domestic Pumps, Agricultural Pumps, Industrial Motors, Domestic Switch Gears, Distribution Boards, Wiring Cables, Industrial Cables, Induction Cooktops, Mixer Grinders, Fans, Rice Cooker, Gas Stoves, Solar Power Systems aser Air Cooler nunger amala oset balala agütsür.