Tsümar den mashi memedemtsüla

Asen lima nung asenok tsürtemi tsümar den mashi medemba ajanga aiben maksü aser lendong ajuruba ngua kanga jashia bilemer aser sasar. Town nung mapa nangdaka liaka asenoki meinyaker asünungji, aonsutsü ayokdak nungi tenzüka dokan tapu ajak den gari yanglushidak aser yin rongtepdak ajak nung tsümartemi dang inyaker. Shitakba agibo, itemji asen lima nung küm junga ILP amer mapa inyaka alitsübaji ILP ozüng agi memelar, kechiyong ILP yabo küm ta masü, ita junga amongtsü asoshia magütsür aser ano asenoki metettsüba kaji ILP ya shishilembatsü asoshi agütsür masü. Item ama rongsen ajangzüktsüba lenmangtem nungi asenokang ajangzüktsüsa linük temzüng ozüng kanga akangaka lateta liaka, asenoki memetet aser metetyonga memetet amato yutsür. Temenünütsü, tejashitsü aser tesasatsü kaji government tashi nung ILP agütsürtemi dena itemji mejangjai agütsür aser jangjayonga item ajakji bilema maor. Iba jagi tanübo tsümartem ajak asen lima nung senso küma, Ao oshi dena asenok dang nungi tajungba jembir. Joko, asenoka state ngur küm 60 jungdi asür asünungji, tangari meshiaka asenoki asenoksasa linük temzüng nung kechi shia lir, itemjibo jangjaa meteta alitsüla aser temzüng ozüngji mapa küma shitak inyaktsü asoshi mapang mapang shia asenoki ola adoktsüla. Tsümartemji teimbaka kibong kümer süaka pei kinuungtsü aser tanurtembo pei yimtak toktsür anir marur, kechiyong parnok ya talitsüba masü saka ayangi aruba purtem dang lir. Item jagi yakta dang tetsürtem mesüzüker aser külemi noksa agia ayur aser tashi mangara, item noksatemji mobile ajanga prokshitsü ta amokmerendaktsür. Parnok aikati kibong akümba miimshir aser asangur ama dang sayur. Item tsümartem jagi asenok tsürtem dang tsüraburtemi memulungaka jena orr court nung kibong kümer arudi ta kangshir. Atangji, iba ama tatidang aser tashiyim agi taküm raksatsütsü merangba mapatem nungi asenok tsürtem aikati jenbutetter saka ano aika mejenbuteti taküm raksadaktsür. Yakanü Mokokchung town nung tsümar kati asenok tsür aiür ka bener ajentsü kangshia lia, kaketshirtemi pua aridokbaji mapa shitak ka inyakogo aser tetsürlajia kangla nungi anitet ama kümzükogo. Angazükba agi, iba  tebursangjia kibong kümadoker pa kibongbo parnok yimtak toktsür aruagi ayangerba liasü. Tetsürlaji pa denji aoka asünunga komaka lia ola ta kanga shisabolua bilemer. Alima nung mapang tatsüka alidang, tetsür asüyonga tebur asüyonga telemputsüla purtem denbo telinür o telinür na alitsübaji menokdangtsüla. Aiben asenoki kibalembutsü asüdang asen yimer mesüra asen kin mesüra takataiter apia kibulembutsü ajungshiteper. Ano, tsüraburtem karibo asen kin aser asen nisung den ashi tangar kintem denbo kenyongi melemputsüla ta nokdanger. Ajisüaka, taküm tatsüka alidang tetsür-a tebur-a pie linüba den pelatepa lira aser par kibongji tangar asoshi temoatsü aser teyari angudak süa litetra, tsümar dena sang, shiba den lidir liaka taküm ali shizüka asütsü. Atangji, tetsürtem dang pei nisung den dang medemtsüla aser kibong akümtsüla ta mashir saka teburtem dang nungibo tetsürtem taküm aser temang ya temelaba raksar, anungji kanga apayua bilemer. Asenok tetsür asüyonga tebur asüyonga, makamait kibong nungi asüba agi aiben tanger nem anishidaktsütsüsa akümer. Ajisüaka, kenü teyari tilaka aginüdang, teti atema asenok taküm raksatsüsa asenoki asen taküm aser temang mapayui amshira, iba jagi asenok taküm piyong molumi nung alir ama alitsüsa akümtsü. Asenok taküm pelaa alitsüba ya senotsü kisüng agi alitsüba masü saka asenok dak Tsüngrem akümtsübuba, pei kin, pei tsürabur aser peisasa pei tenüngmenüktsü tsübua bilemba agi, peisasa azüoka aliba tashi agi temoatsü küma alitsü. Asenoki tsümarbo ajak takar asütsü amai bilemer, ajisüaka asenoki metettsüba kaji, asen limai ayangi aruba nisungji kanga takarbo masütsü, anungji parnok den medemtsübaji noklangben bilemdangtsüla aser parnok nem asenok mashiokdaktsütsüla.