Meküli yimdak tetsüi pei chir ana südaktsü

Mokokchung, April 04 (TYO): April 4 nü Meküli yimdak tetsü kati pei jabaso arishi küm 2 tain ka aser arishi küm ka jala ta razor blade techira amshia tanur anaji rangseta südaktsü, ta Mokokchung police osang ka ajanga metetdaktsü.
Iba osang ya tanep 10:30 ako nung angashili women police-tem tesem atongba mapang tanur anaji süadoker liasü aser tanur ana dakji tekong nung arangba zübu keter angu aser tetsü Yimjunglemla (arishi küm 24)-ji yirur Mokokchung Civil hospital-i anir orr liasü, ta police osang ajanga metetdaktsü.
Iba atalokba mapang tanur tebu Nungsangmeren Phom (Yongshi Village, Longleng district) kidang maliasü, ta osang angazüker. Par kibong ya Meküli yimdak alir.
Iba tatalokba dak sentakba nung case registered süogo aser tang iba indangji tebushidak lir, anungji, tatalokba kulijibo iba sülenjiang agütsütettsü, ta Police ketdangsürisa metetdaktsü.