Candidate asoshi sarasadem

Tang ama election mapang ABAM-i Aor candidatetem ajak Impur-i jaoka sarasadem mapang agibaji ‘Clean Election’ sentong dak aketba mapatem ajak rongnung tongtibangba ka asütsü. Atangji, candidate-tem ajak atema sarasademtsür asünungji, pa mesüra la adokdakjang ta Tsüngrem dang tenüngteta makanger, saka election nung toktepertem ajak nem Tsüngrem akümtsübua ochi agi nübortem tenzüktsü mulungtetba shisatsü aser tangatetba agüjang ta sarasademtsür. Iba denji külemi Ao kin asoshi temeshi lima Impur nung Tsüngrem tenzükertem matsüngdang candidate-tem ajaki pei tangatetba lemsatepdaktsüba sentong jagia parnok Tsüngrem anasai bener arur. Tanü putu nung asen lima agi ojangji, election nung toktepertem karbo kodanga sarasadem mesüdangba nisungtema asütsüa akok. Ano karbo election nung takok angutsü atema tashiyim mapa inyaktsü asoshi tapu tapu sentong renema alitsüa akok. Itemji Election Commission tashi kisüng agi menokdangtettsü, kechiyong item mapa tamajungtemji nokdangtsü purtem teyari agia dang inyaker. Election mapang nung sen, yi aser prangpong injang menokdangtetbaji item tashi aser teyari agia inyakba ajanga lir. Ajisüaka, sarasadem agibo nokdangtettsü. Atangji, senso shia atemabo pei-i yarinüba mesüra semnüba candidate kaka lir, anungji pa mesüra la atemaji sarasademtsütsübaji tamanger shia asoshi kanga tenüngdaktsü mapa ka asütsü. Ajisüaka, mongdang aser arogo asoshibo kija aser yimten telok kecha tebendang melii Tsüngrem nem bendanga agüja sarasademtsütsübaji kanga tongtibang teinyaktsü mapa ka asütsü. Iba ama sarasadem jagi asen lima nung asenoki ngua temelenshi arutsü. Kodang asenoki temulung ajak agi yamaji sarasademtsüdir, mongdang aser arogo tenzükertemi anir Tsüngremi mulungba nung election  nung shilem agi tenzüktsü. Iba amaji, kodang mongdang aser arogo lenirtemi ochi puküma Tsüngremi mulungba nung election nung shilem agia sayudir, parnok sülenji nütsüngtemi anidaktsü. Taoba election nung yamaji Tsüngrem tenzükertem aika kidang Clean Election nisan temesüng songa yur ochishia election nung shilem agiba angashiogo. Ochishia shilem agiba tetezü pei vote kechayonga meyoki tangatetba agi peii junger ta bilemba telok aser candidate yariba. Atangji, tangarbo pei vote melen sen meshia agir, anungji asen magibaji takoksa tulu amai bilema alitsüa akok, saka election temer küm ka, ana aser asem ta süia aodang, election nung sen agirtem o magirtem taküm aser kibong asadangang aser tatalokbatem reprangdangang, nai hau, Tsüngrem lir ta shitettsü. Asen lima yanglutsüba mapangji election mapang ya lir. Iba mapang asenoki telok telok tentetter candidate dang sen meshitsü melena telok telok ayongteper sarasademtsüi ora, iba jagi candidate mulung melenshitsü aser asen lima nung Tsüngremi mapa inyaktsü. Aseni mulungba masü saka Tsüngremi mulungba shimtsü aser inyaktsü atema Tsüngrem nem bendanga agütsüba mapaji aji asütsü. Atangji, sarasadem ya election mapang nung dang masü saka ano election temer külenang tenüngdakba, kechiyong tadoker aser madokertem ajak asoshi Tsüngrem leniba nüngdaktsü. Ano, tadokertem asoshi balaka khuret tulu lir, kechiyong parnoki Tsüngrem mulung chidakja nübortem madak yimsü asütsübaji kanga tongtibang asütsü. Ashiko, yimsüsür kümerbo aser yimten tashi teka dangi arurbo, nisung aikati election mapang sarasademba to amadoker, Tsüngrem aser nübortem dang nungibo alima rongsen aser japujariba mapatemang temeimba akümtsüa akok. Idangji, yimsüsüsangji dang masü saka nübortema dena akoksar aser alima shirang tenzüker. Iba amaji masütsü atema election mapang nung jaoka sarasademba ama, ABAM lenirtemi küm shia mapang tajung ka agiteta yimsüsürtem ajak Impur nung jaoka, kokra lumia sarasademba sentong ayongzüka agitetra, iba jagi, ashiko, Tsüngremi asen lima aneptsütsü.