Aoleang benjung tanünübuba nung süngkong atsü

April 04, 2019 nü Mon town nung Aoleang Mini hornbill benjung tanünübuba sentong nung Mon village-i süngkong atsüba noksa nung angur.

Mon, Rongchii/April 05 (TYO): April 04, 2019 nü Mon town nung Aoleang Mini hornbill benjung tanünübuba nung Mon village-i süngkong atsüa liasü, ta ketdangsertem osang ka ajanga metetdaktsü.
Iba sentong nung tetushi tejaoker, Sena Medal Commander 7 Sector AR, Tuensang, Brigadier Suresh Sheoran-i, terenlok aser azükaru alitsü atema alima nung langka dang nüngdak, aser ibaji yimjung lir, ta metetdaktsü.
Tesem nung yimjung alitsü atema Assam Rifle-i akokba lenmang ajak agi inyakdar, ta paisa ashi.
Konyak nunger sobaliba, yimyatsüya aser senmang takar lir, ta shia pai, Anghtem aliba li nung shilem agitsü maongka anguba atema pelar, ta shia nüburtem dang amaliteptsü aser nüngdakba mapang ajak nung Assam Rifle ajurutsü metetdaktsü.
Pai ashiba agi, skill development atema Sainik School nung join asütsü jangrar kaketshirtem asoshi Assam Rifles-i sponsor asür aser career guidance agütsür, iba dak alia Indian Army nung adentsü jangrartemi teyari atema AR ajurutsü akok.
Iba benjung nung alakteta jaoker Ao Senden Tir, Chubawati Longchar-i lokti dang, Aor aser Konyak nunger na akhidang nungi tesendaktep kanga junga liasü kümtem süia aodang pilaadok, anungji asenoki iba tesendakatep yangershitsü atema longjemdi, ta ayongzük.
Iba anogomong nung Phom Union, Mon Town-i sobaliba yar tsüngsang, Chi Union, Longkei Union-i asem atem, Longwa Union, Tobu Union, Chen Union aser Mopong Hongkong-ia shilem agia liasü.