Mahajan-i LS election nung metokteptsü

New Delhi, April 05 (Agencies): BJP lenir aser Lok Sabha Speaker, Sumitra Mahajan-i, lai joko election nung metoktepner, ta metetdaktsü.
Sumitra Mahajan-i Madhya Pradesh kübok Indore Lok Sabha constituency nungi tokteptsü atema party ticket angutsü imlaa liasü. Lai ashiba agi, Indore nungi BJP candidate tenüng sangdongtsü menoba agi joko lai election nung metoktepner, ta ashi.
Tanü Lok Sabha Speaker, Sumitra Mahajan-i shidi ka ajanga lai joko Lok Sabha elections nung metoktepner, ta ashi.
Sumitra Mahajan-i züluba shidi nung yamai shia lir, “Indore nungi tokteptsü atema party [BJP]-i candidate mesangdong. Parnok (lenirtem) terata kar alitsüa akok. Tamalen ni bangdak lenirtem den o lemtep aser telemtetba agitsü atema parnok nem mapang agütsü. Tang tashi parnok ratamadar amai ni reprangteter. Ibayongji joko ni election nung metoktepner ta sangdonger.”
Sumitra Mahajan ya 8 ben tashi MP inyaker.
BJP lenir tain, LK Advani-i blog ka ajanga party nung inyakertem den jembiba sülen anogo ka lir Mahajan-i tanü iba osang ya sangdonger.
Advani-i Lok Sabha Gandhinagar menden nungi toktepa aruogo, ajisüaka takümbo pa agiener party-i iba menden nungi tokteptsü atema BJP Tir, Amit Shah shim.
Advani dak alia BJP lenir tain, Murli Manohar Joshi nema party ticket magütsü.