Elections jakdang NE bank tem nung sen aika enoker

Guwahati, April 5 (Agencies): Elections agitsü anogo tonga arudang Income Tax Department indang regional office-i Northeast kübok bank balala nung sen aika bendena aliba osang metetdaktsü.
Iba ajanga sen yong vote alizükba mapa inyaktsü temulung melemi bilemer, ta Income Tax Department-i ashir.
Arunachal Pradesh kübok Pasighat nung tawa BJP convoy ka nungi sen crore 1.8 shi apuba sülen iba osang metetdaktsüogo.
Tesüiba anogo 10 tsüngda temulung malemtsüsa bank tem nungi sen agizükba metetogo aser senji Northeast kübok bank tongti pungu nungi agizükbatem liasü, Income Tax Department-isa ashir.
“Bushisüngdangtem ajanga nisung kari temulung malemtsüsa sen bank tem ajanga belenshiba ajiteogo. Sen lakh 10 tema sen enokba aser agizükbatem dak tenük yoker. Tang tashi nung iba mesükba inyakyim 200 shi dak bushisüngdang südar” ta Income Tax (Investigation) principal director Sanjay Bahadur-i Guwahati nung ashi.
Lok Sabha elections agitsü anogotem osang metetdaktsüba sülen Northeast kübok district 112 aser airport 12 mita anüktsü atema ketdangser 150 dak tema mapa lemzükja lir, ta Bahadur-isa shisem.