Congress manifesto ya tashioktsüba kaket ka lir: PM Modi

Amroha (Uttar Pradesh), April 05 (Agencies): Tanü Ato kilonser, Narendra Modi-i, opposition party atema tongtibang onükji pa Ato kilonser menden nungi agientsü lir aser kibong kati yimsüsüba ajungkettsütsü atema lir, ta ashi.
Tanü Saharanpur (Uttar Pradesh) nung election nüboyim senden ka nung jembidang pai, Congress party indang manifesto ya tashioktsüba kaket ka dang lir, ta aitsü.
“Opposition onükji ‘Modi agientsü’ lir. Parnok nükjidongji kibong kati yimsüsüba ajungkettsütsü atema lir,” ta ashi.
Saharanpur nung Lok Sabha election April 11, 2019 nü agitsü lia tanü Modi-i, RLD tongti, Ajit Singh-i par nüburtem anema inyakbatem amadokogo aser pai ola madoker, ta ashi.
Uttar Pradesh nung RLD ya SP-BSP teloktep nung dena lir.
“Saharanpur-i SP, BSP aser Congress party tem indang vote bank politics magizüktsü. Yangi nüburtemi BJP dak tamang akar,” ta pai ashi.
Congress-i backward nüburtem anema inyaker, ta shia Modi-i, Rajiv Gandhi (taoba Ato kilonser)-i Mandal commission-i benokba onüktem anema nokdak, ta ashi.
“Prayagraj nung Kumbh mela mapang ni jana aokertem tetsüng shidoktsüba mapang nung aianu (BSP tongti Mayawati)-i ni menütsü, ajisüaka Congress-i jana aokertem mezüngmeshidangbo lai ola madok,” ta paisa ashi.