KLST Hon Jubilee benjungmung mongogo

Kohima, Rongchii/April 05 (TYO): Kohima jila kübok Molu Ki nung April 4, 2019 Brehostibarnü ‘Mera Tasen Jangzü’ (Trumpet for a New Step) omen nung ajemdaker Kohima Longjang Senso Telongjem Golden Jubilee benjungmung sentong ayongzüka agia liasü.
Sentong nung Director Information & Public Relations, Limawati Ao-i ‘Mera Tasen Jangzü’ onük nung ajemdaker jembiba mapang pai, technology putu marudang, akhi tejen putu mapang tongbang rara nung tsükchir aruba metetdaktsütsü atema sepaitemi jangzü mesüra tsüngtsüng balala amshia liasü.
Iba amaji, lokti ka nunga tetuyuba aser tekümdangtsü tem tenok tenoka repranga aser angatsüla. Akhi tejen putu mapang nungi meimchirtemi terenlok mapatem inyak tenzük, kong temelenshi balala melungi ajangshia aru saka tawa- tanü data putu nung, internet ajanga terenlok jenti bener arutsüogo, koba dang ‘Age of Acceleration’ ajar, aser iba ama kanga dang kara renloka aoba ajanga alima ya global village ka kümogo, ta Limawati-isa shisem.
Anungji, tanü Kohima Longjang Senso Telongjem ya Union tejen ka asünung, tesüiba mapang aibelenbatem asadangtsü aser alimar yimya melenshia aoba ama tejenba yimyatem toktsür rongsenketsüng ajungkettsüba, tourism, shisaliok, shishilembaba tsütsü jangyumedema aotsü aser yimtsüng nung yimertem atema lennir tajung ka ama asütsüla.
Kasa sentong nung, union tenzüktsür rongnung ka, T. Sashimongba Pongen-i jembiba mapang, 1969 küm April 4 nü teintet rogu par 8 sentepa Kohima Longjang Senso Telongjem tentetba bilemtet aser union tashiita bener aotsü atema taküm bendanga agüja inyakbatem indang lemsatep.
Parnoki indang tsüngsü nung jajatsü aser iba den külemi ochishia aser meranga inyaktsü atema KLST dang Sashimongba-i tayongzükba agüja liasü.
Sentong nungsa T.N. Mannen IAS (Retd)-i telok ayongzüka jembiba mapang, asenoki mapang timi ketdangsüa aser shitak amshitsüla, ta ashi. Pai, KLST dang akhi tejen putu mapang ama melii, ochi nung longjema aser temeimtep nung nükla aser nükjidong tasen yur tejakleni aotsü atema tayongzükba agüja liasü.
Chief Engineer, Department of Water Resources, Er. Tsuktinungsang-ia telok dang tayongzükba o agüja liasü.
Maneni, President, Kohima Aor Telongjem, Chiden Yaden, President, Kohima Asetkong Senso Telongjem, Supongyanger Imsong, President, Dimapur Longjang Senso Telongjem, Y. Among Jamir, President, Longjang Senso Telongjem Mokokchung, I. Ali Aier aser Longjang Village Council, Wailemba Jamir nungeri o tatsütsü jembi.
Iba sentong nung Phutoli L. Jamir-i Golden Jubilee Souvenir sayatsü. Asür tem nem teloki minute1 mokremer aküm agüja liasü. Sentong nung tongtibang shilem rongnung Jubilee sangro azüngba, sobaliba ken aser ken balala atenba tem densema liasü.