Nagaland nung sen crore 3 jungnüa apu

Kohima, April 5 (TYO): April 11 nü Nagaland nung Lok Sabha menden aser 26-Aonglenden Assembly Constituency menden atema elections agitsü hopta ka shi dang anünga lia, state kübok tesem balala nung sen crore 2.96 shi alangba yi, mozü aser sen puogo.
Election agitsü osang sangdonger Model Code of Conduct tenzükba sülen tanü Hokolbar tashi nung crore 3 jungnüa apu, ta Chief Electoral Officer Nagaland, Abhijit Sinha, IAS-i metetdaktsü.
Sen apuba ajak agi Rs. 89,58,240 liasü. Iba nung Income Tax Department-i Rs 72.10 lakh aser Flying Squad (FS), Static Surveillance Team (SST) o Police force-i Rs 72.10 lakh dena lir, ta Abhijit Sinh-isa ashi.
Maneni, Nagaland kübok tesem balala nung Rs 1,72,40923.583 shi alangba yi litre 61,624.93 apu, ta paisa shisem.
Iba mapang Rs 34,14,435 alangba Mozütem (heroin, ganja, brown sugar, cough syrup aser tanga mozütem) apu.
Nagaland CEO-isa ashiba agi, tang tashi nung prangpong 8, tapoktsü 10 aser injang 74 tashi ngutetogo aser licensed arms 2546 tashi agüja lir.
CrPC nung arrla kar kübok lendong bentsür arutsü ta temulung melemi bilemba nisung 768 tashi pua lir aser lendong ataloktsü ta ajitba tesem 172 tashi jangjateta lir, ta CEO-isa ashi.
March 13 nungi tenzüker tang tashi tashi election dak sendakba mepetmesü nung nisung ana yiru aser Rs. 10,000 shi alang osettsüsettem raksatsüogo, ta paisa ashi.