Kechi atema vote enoktsütsü ?

Joko election atongtsü asoshi anogo ana dang lir asünungji vote agütsütsü temeten alirtem teimbaka kechi telok mesüra shiba nem vote agütsütsüar telemtetba agiadoker asütsü imlar. Atangji, yimten nung senso ka asoshi election ya kanga tongtibang asünungji senso ajaki nüngsen aser timtem arema pei vote peisasa enoktsüi aotsüla. Ajisüaka, vote meinoktsüdang peisasa telemtetba agitsü atema kechi atema vote enoktsütsü (?) ta asüba tasüngdangbaji tama tangatetba agi langzütettsüla. Vote-bo enoktsü saka kecha tangatetba aser teimla ka maliser enoktsüba vote jagi asen lima asoshi kecha balaka tajung meinyaktsü. Yimten aser lokti nung nisung ajak temeten kasasa dang lir, ibayongji senso shia vote kaka dang aser iba vote jagi yimsüsür shimtsü atema election agir. Iba temetenji jenjang kanga tasak, anungji ayoktsü aser alitsü makok. Iba jenjangji memeteti asenok kari sen tera yong mesüra mapa tilakayong asenok vote ayoker. Iba jagi election mapang ya pei lima aser nübortem asoshi nüngdak onüktem benoka jembitsü melen onük masü sen otsüang jembir anener. Ashiko, tang parliamentary aser assembly election agiba nung yaa party shia pei nükjidong ( manifesto) nübortem nem angatetdaktsütsü asoshibo nübortemi mapang magütsüi alitsü. Ochi o kaji, tang ama election mapang nisung shiangaia candidate mesüra yimten telok dang election nung toktepba nükjidong metetnüa masüngdanger. Tetezü, yimten telok nükjidong angatetba agi masü saka election mapang pei asoshi tajangzük tilakabo angur asü mangur ta asüba nung temulung tagütsüba agüja election nung shilem agir. Tang election nung ya Congress teloki parnoki government akümtsüsa takok ngura, sepaitem nem telongpurtem anema inyaktsü asoshi tashi onsara tali agüja aliba Armed Forces Special Powers Act ozüng ya meyipa reprangshitsü aser kanga sensaker shia nem küm shia sen meyirijang neteranana agütsütsü aser ano Citizenship Amendment Bill kenyongi tatar senden nung mebenoktsü ta asüba onüktem nangzüka lir. Ano, külen BJP telokia parnokisa ano khen government akümtsüsa takok ngura, Citizenship Amendmenr Bill ozüng küma latettsü asoshi benoktsü aser Jammu & Kashmir state nem yimten jenjang balaka agüja aliba temeten ya temzüng nungi agientsü ta nangzüka lir. Item dakji alaka yimten telok ajaki nübortem jenjang tajungba küma anepalutsü asoshi teinyaktsü onüktem tajung aika bendena nübortem tsüngdang nangzüka odagi. Nübortem asoshi bilemdanger telemtetba agitsüba yimten onüktemji aji asütsü. Nübortemi item onüktem nungji yimten teloktem den ashishiteptsüla aser angatettsü merangtsüla. Iba jagi election nung nangzükba o agi election temer mapa akümtsü. Election  nung pei vote sen meyirijang ishika yong ayokba agi yimten teloktemi election temer inyaktsütsü nangzüktsüba onüktem tobo kenyongi tejembidak maka ser election atemer, anungji election temer külena kecha balaka khuret tuluka mali tatartem pei inyaknütsü inyaker. Ibayongji, tatartema aika arishi piyong yimten nung liaka, tsüngsü kecha maka, aküm maket aser tasoa meshizük ta asütsüsa arishi anogo tembanger. Election nung vote  ayokba indang tanü asüng social media nung lemsatepba otsü ama, sü (mithun) jenjangbo lakh ka, jang aser nashi jenjang sen meyirijang tenem, ak aser napong jenjang sen meyirijang metsü, azü jenjang sen meyirijang pongo aser an jenjang sen noklang pongo ta shirurutem jenjang anogo shia atur, ajisüaka asenoki asen votebo sen noklang pongo aser meyirjang ka yong ayoker. Asen vote jenjang ya sen crore aika danga taoba ser nung asenoki asenoksasa asen vote jenjangji an jenjang den kasasa lua yanglur. Iba jagi asenoki alima nem teimla magütsütetter aser teimla tajung ka maliba agi ajaki pei ajung asaa inyaker. Nübortemi election mapang sen masü saka election temer sen aika angutsüsa sentong tajung yanglua alima renloktsü nükjidong aser mangdang tajung aliba telok aser nisung bushitsüla. Nagaland nungbo kechi telok adokdir adokang, oagi center nung kechi teloki yimsü südir, iba telok denji apteptsüang lenirtemi bilema alitsü. Ibaji alar kolok lir. Joko, lanurtemi iba alar kolokji yutsür, peisasa pei yimten aser lokti nung  kibur küma khuret agi temoatsü küma inyaktetba kolok agi melentsüla.