Manipur HC-i journalist Wangkhem chioktsü tuyur

Imphal, April 8 (Agencies): Manipur High Court-i journalist Kishorchandra Wangkhem chioktsü atema tetuyuba agütsüogo.
Journalist Wangkhem ya local news channel ka atema anchor-reporter liasü. Pai Manipur chief minister N Biren Singh aser Prime Minister Narendra Modi anema jembiba atema November 21, 2018 nü apu.
November 27 nü pa NSA kübok tai tongloktsü aser on December 13 nü pa indang onük atema tentetba board kati pa küm ka atema tepuokdak ayutsü mulunga agizük.
NSA kübok tai tonglokja apuba sülen telok aikati iba telemtetba anema noktak.
Wangkhem-i December 20, 2018 nü pa apuba anema High Court nung temepishiba ka benok.
“Onok nem tebang agi osang sangoktsüogo aser tezüluba nung tetuyuba angutsü atar. State administration nungi sign kar agitsüla aser iba atema anogo ana-asem ka agitsü akok. Iba sülen pa chioktsü” ta Wangkhem kinungtsü Ranjita Elangbam-i osangbener dang ashi.
Wangkhem ya taküm March ita nungi temang manemi kümer Jawaharlal Nehru Institute of Medical Sciences, Imphal nung anepaludar.