Nagaland nung LS aser by-elections atema temetettsütem

Dimapur, April 8 (TYO): Nagaland nung April 11, 2019 anepdang 7:00 ako nungi nikongtsütsü 4:00 ako tashi polling asütsü aser polling party teimba ka April 10 nü pei lemzükba tesemi aotsü, ta tanü CEO Nagaland, Abhijit Sinha-i metetdaktsü.
Hotel Japfu, Kohima nung osangbener den jembidang “polling stations (P-2) 325 atema polling ketdangertem April 9 nü apusoa aotsü kechiyong item polling station temji district headquarters nungi meta talangka pilar lir. Meta talang pilar aliba polling station teimba ka Mon district nung lir” ta ashi.
“Gari talila bendena aliba district temji Dimapur aser Kohima lir aser gari 700 shi ka Guwahati nungi yok. Gari talilatemji tanga district temi yoktsü anungji gari agi meperiba tebilemtsü kecha mali,” ta CEO-isa metetdaktsü.
District ajak nung machine tem agütsüogo aser Polling stations 90% nung power supply, tzü tajemtsü aser metsümeshidak lir, ta paisa ashi.
Nagaland Parliamentary Constituency nungi Lok Sabha election aser NLA 26-Aonglenden (ST) AC indang By-Election atema nüboyimba maparen April 9, 2019 nikongtsütsü 4:00 ako nung tembangtsü. Maneni, polling agitsü jakdang ghonda 48 tsüngda public sentongtem agiba noktanger, ta Abhijit Sinha-i nenshia metetdaktsü.
Iba tetuyuba anema inyakertem tepuokdak küm ana tashi mesüra senchi achitsü mesüra onük anaprong agi merenshitsü akok, ta paisa shisem.
Election Commission-i April 11, 2019 anepdang 7.00 ako nungi May 19, 2019 nikongtsütsü 6:30 ako tsüngda General Elections aser assembly constituency indang by- elections dak sendakba exit poll kecha magitsü aser print mesüra electronic media nung osangtem meproktsü atema tenokdangba agüja lir, ta Sinha-isa shisem.
Tang mezüng atema Nagaland nung polling station shia nung Braille Dummy Ballot Sheet amshitsü. Maneni, Nagaland indang electoral roll nung PwD voters 6002 züluoka lir aser iba atema polling station 250 dak tema nung Wheel chairs agütsüogo, ta paisa metetdaktsü.
1-Nagaland Parliamentary Constituency atema candidate pezüprongla nem show cause notice agütsüogo aser elections nung Village Guards personnel tema mapa lemzüktsüogo, ta Returning Officer & Commissioner, M. Patton-ia osangbener dang ashi.
CEO Sinha-i election mapang sen aser yi apuba osang metetdaktsüdang Rs. 92,26,240 aser yi litre 62,948.92 apuba ashi.